5 июня вспоминают

• Преподобный Аврамий (Авраамий) Ростовский, архимандрит (1073-1077).

• Святитель Леонтий, епископ Ростовский (1077).

• Мученица Евдокия Шейкова (1919).

• Святитель Иов, патриарх Московский и всея Руси (1652).

• Праведный Феодор Ушаков, воин (1817).

• Святитель Тихон (Беллавин), патриарх Московский и всея России (1925).

• Святитель Стефан (Великопермский), епископ Пермский (1396).

• Преподобный Сергий Радонежский, игумен (1392).

• Преподобный Серафим Вырицкий (Муравьев), иеросхимонах (1949).

• Преподобный Павел Ростовский, Борисоглебский, игумен (1394), и Святитель Феодор, архиепископ Ростовский (1409).

• Святитель Феодор, епископ Ростовский и Суздальский (1023), и Иоанн, епископ Суздальский (1373).

• Преподобный Петр Ордынский, Ростовский, царевич (1290).

• Преподобный Паисий Галичский, архимандрит (1460).

• Преподобный Никодим Кожеезерский, Хозьюгский (1640).

• Преподобный Никита Столпник, Переяславский (596).

• Святитель Лука (Войно-Ясенецкий), архиепископ Симферопольский, Крымский (1961).

• Блаженный Исидор Твердислов, Ростовский, Христа ради юродивый (1474).

• Преподобномученик Адриан Пошехонский, Ярославский, игумен (1550).

• Преподобный Геннадий Костромской, Любимоградский (1565).

• Благоверный князь Александр (в схиме Алексий) Невский (1263).

• Благоверный князь Андрей Смоленский, Переяславский (1390).

• Преподобный Афанасий Высоцкий, Серпуховской, Младший, игумен (1395).

• Мученик Василий Мангазейский (1600).

• Блаженный Иоанн, Большой колпак, Христа ради юродивый, Московский чудотворец (1589).

• Блаженные Василий (1557) и Иоанн (1589) Московские, Христа ради юродивые.

• Преподобный Даниил Переяславский, архимандрит (1540).

• Преподобный Иринарх Ростовский, затворник (1616).

• Преподобный Димитрий Прилуцкий, Вологодский, игумен (1392).

• Святитель Димитрий, митрополит Ростовский (1709).

• Благоверный Димитрий Угличский и Московский, царевич (1591).

• Преподобная Евфросиния Полоцкая (до крещения княжна Предислава), игумения (1173).

• Святитель Иаков, епископ Ростовский (1392).

• Блаженный Иоанн Власатый, Милостивый, Ростовский, Христа ради юродивый (1580).

• Мученицы Евдокия Шейкова, Дария Улыбина, Дария Тимагина и Мария Неизвестная (1919).

Молитвы на 5 июня

Преподобный Аврамий (Авраамий) Ростовский, архимандрит (1073-1077)

Преподобному Авраамию Ростовскому молятся при параличе, переживаниях о неверии близких.

• Тропарь преподобному Авраамию Ростовскому, глас 1. «Просветився Божественною благодатию, неверныя люди наставил еси к свету Богоразумия: и по смерти сияя светлостию жития твоего, источаеши исцеления притекающим с верою к тебе, Авраамие отче наш, Христа Бога моли даровати нам велию милость».

• Кондак преподобному Авраамию Ростовскому, глас 2. «Иго Христово прием, Авраамие, и Того крест на рамо взем, последовал еси Ему, насажден быв в дому Господни и процвел еси, яко финикс и яко кедр, иже в Ливане, умножил еси чада твоя, муж желаний духовных от возлюбленнаго же апостола Иоанна Богослова благодать восприим, жезлом сокрушил еси идола и рассыпал еси его, яко прах, и чудотворец убо велий явился еси, преподобне. Тем же Христа Бога моли непрестанно о всех нас».

• Величание преподобному Авраамию Ростовскому. «Ублажаем Тя, преподобне отче наш Авраамие, и чтим святую память твою, наставниче монахов и собеседниче Ангелов».

• Молитва преподобному Авраамию Ростовскому при параличе, переживаниях о неверии близких. «О преподобие отче наш Авраамие! Не забуди нас, но поминай всегда во святых твоих благоприятных молитвах к Богу. Помяни стадо твое, еже сам и пасл еси, и не забуди посещати чада твоя, и моли за ны, отче священный, яко имея дерзновение ко Господу: не мним бо тя мертва суща, аще и преставился еси от нас, пастырю наш добрый! Се мощи твоя святыя пред очима нашима: святая же твоя душа с Ангельскими Безплотных лики у Престола Всех Царя пред стоящий достойно веселится. Испроси убо нам время на покаяние, еже невозбранно прейти от земли на Небо, и вечнныя муки избавитися, и Небеснаго Царствия наследниками быти со всеми праведными, от века благоугодившими Господу нашему Иисусу Христу. Емуже подобает всякая слава, честь и поклонение со Отцем и Святым Духом, ныне, и присно, и во веки веков. Аминь».

Святитель Леонтий, епископ Ростовский (1077)

Святителю Леонтию, епископу Ростовскому, молятся о спасении России.

• Тропарь святителю Леонтию, епископу Ростовскому, глас 4. «Апостолом сопричастник и к Богу молебник верен, добродетельми возшед на Небесная, и любовь возложил еси к Любящему тя, и неверныя люди обратил еси в веру. Тем ныне, со Ангелы ликуя, предстоиши престолу славы всех Царя Христа Бога: молися, святителю Леонтие, да спасет души наша».

• Кондак святителю Леонтию, епископу Ростовскому, глас 4. «Жития ради чистоты, Всевидец Господь свет Свой насади в души твоей, вразумити люди многия твоими учении, Леонтие преподобне».

• Величание святителю Леонтию, епископу Ростовскому. «Величаем тя, святителю отче Леонтие, и чтим святую память твою, ты бо молиши за нас Христа Бога нашего».

• Молитва святителю Леонтию, епископу Ростовскому, о спасении России. «О, священная главо, преславный чудотворче, первопастырю святыя Ростовския Церкве, святителю отче Леонтие! К тебе припадаем и молимся мы, смиреннии и грешнии и, яко отца чадолюбиваго, просим: всели в сердца наша любовь твою, еюже к Богу и ближним твоим при жизни твоей преисполнен был еси, яко и душу твою за паству твою положил еси, мученически пострадав от идолослужителей, научи нас, отче, тебе подражати верно, Бога и ближних наших любити искренно и заповеди Господни совершати непогрешительно, да будем и мы чада твоя не по имени токмо, но самым делом и всем житием нашим. Молися, угодниче Божий, ко Христу Богу о святей Православной Церкви и державе Российской: да пребудут в мире и благостоянии и процветают в благочестии христианстем непоколебимы. Соблюди град твой Ростов и вся грады и веси страны Российския невредимы от всякаго зла. Призри благоутробно на всяку душу христианскую, милости и помощи от тебе ищущую, буди всем нам в болезнех целитель, в скорбех утешитель, в печалех избавитель, в бедах помощник, в час смертный покровитель; да при помощи молитв твоих святых сподобимся и мы, грешнии, спасение вечное получити и Царствие Христово унаследовати. Ей, святителю Христов! не посрами упования нашего, еже по Бозе и Пресвятей Богородице на тя крепко возлагаем, но яви нам твое многомощное заступление, да хвалим, славим и величаем великое человеколюбие дивнаго во святых Своих Бога Отца, и Сына, и Святаго Духа, во веки веков. Аминь».

Мученица Евдокия Шейкова (1919)

Мученице Евдокии Шейковой молятся об укреплении в вере.

• Тропарь мученице Евдокии Шейковой, глас 4. «Древним подвижником уподобилася еси и долготерпение многострадальное стяжала еси, плоть твою болезньми, постом, нищетою и холодом изнуривши, блаженная мати наша, мученице Евдокие, страдания и смерть за Христа претерпела еси и ныне в горнем Иерусалиме у Престола Божия предстоиши, помози и нам до конца верным Господу быти и твоими молитвами спастися».

• Кондак мученице Евдокии Шейковой, глас 8. «Истинныя веры проповеднице безбоязненная, мученице мати наша Евдокие, непрестанною молитвою, бдением и смирением благодать Святаго Духа стяжала еси и души многия ко Христу привела еси, доблестно страдания лютая прияла еси, моли Милостиваго Бога спастися душам нашим».

• Молитва любому святому. «Угодниче Божий (имя святого рек). Поминай нас в благоприятных твоих молитвах перед Христом Богом, да сохранит Он нас от искушений, болезней и скорбей, да дарует нам смирение, любовь, рассуждение и кротость, и да сподобит Он нас, недостойных, Царствия Своего. Аминь».

Святитель Иов, патриарх Московский и всея Руси (1652)

Святителю Иову, патриарху Московскому и всея Руси, молятся о спасении и сохранении России, об укреплении веры.

• Тропарь святителю Иову, патриарху Московскому и всея Руси, глас 5. «Православия поборниче, веры Христовы исповедниче, первоиерарше Церкве Русския, святителю отче Иове, за ны Христа Бога моли, веру отеческую утвердити, грехов оставление нам даровати и подати миру велию милость».

• Ин тропарь святителю Иову, патриарху Московскому и всея Руси, глас 3. «Да торжествует Церковь Христова и да радуется град Москва яко возсия светильник земли Российския во исповедании Истины непоколебимый Иов Патриарх, егоже молитвами, Господи, вся соблазны мира сего и ереси искорени, люди во благочестии настави и утверди в Православии».

• Кондак святителю Иову, патриарху Московскому и всея Руси, глас 7. «В годину лютых искушений многострадальному Иову подобяся, в жертву живу и непорочну себе Христу принесл еси, обратив паству к покаянию, терпеливе Иове святителю, моли и нам за вся благодарити Господа и всегда воздавати славу Богови».

• Ин кондак святителю Иову, патриарху Московскому и всея Руси, глас 6. «Светильник Церкве Русския и пастырь добрый явился еси, святителю отче Иове, молитвою твоею ко Господу храни землю Российскую и спаси души наша».

• Молитва святителю Иову, патриарху Московскому и всея Руси. «О, преславне отче наш Иове, первенец во Патриарсех Российских и верный исповедниче Христов! Во дни святительства твоего мудро Церковь Российскую пасл еси, люди просвещая и утверждая словом Христовы веры, храмы и обители созидая, таже Церковь Российскую укрепляя от моря до моря и даже до границ Сибирских. Тверд муж и исповедник Православныя веры явился еси, отче, во времена попущения Божия, таже поругание и изгнание подъем, во обители пустынней, идеже и чин иноческий приял еси, душу твою в руце Божии светло предал еси. Не престай, святче Божий, первосвятителю Христов, люди земли твоея укрепляти, веру Православную крепко держати и во смирении пребывати. Град стольный Москву сохрани и от нахождения лютых избави. О святителю претихий и премудрый! Сподоби и нас светлости ради жития твоего смиренномудрию поучитися, да тако живуще, мирный конец сподобимся прияти и Царствие Христа Сына Божия получити славными и милостивыми молитвами твоими. Аминь».

Праведный Феодор Ушаков, воин (1817)

Праведному Феодору Ушакову, воину, молятся для защиты от врагов, о наступлении мирных времен, даровании мужества и веры, об избавлении от греховных помыслов.

• Тропарь праведному Феодору Ушакову, глас 1. «Державе Российстей архистратиг непобедимый явился еси, агаринскую злобу нивочтоже вменив и разорив: не славы мирския, ниже в богатства взыскуя, но Богу и ближнему послужил еси, моли, святе Феодоре, воинству нашему даровати на враги одоление, отечеству во благочестии непоколебиму пребыти, и сыновом Российским спастися».

• Кондак праведному Феодору Ушакову, глас 2. «Архистратиже Российский, служителю народа Божияго, нищих и угнетенных свободителю, нечестивых наказателю, полезное нам проси и велию милость, яко споборник наш праведне болярине Феодоре».

• Величание праведному Феодору Ушакову. «Величаем тя, святый праведный отче наш Феодоре, и чтим святую память твою: ты бо молиши за нас Христа, Бога нашего».

• Молитва праведному Феодору Ушакову для защиты от врагов, избавления от греховных помыслов. «О преславный защитниче земли русския и веры прпвославныя усердный поборниче, непобедиме воине Феодоре! Никая благодарственная словеса, ниже изящная витийства довлеют, во еже прославити праведное и дивное твое житие, понеже измлада крепкую веру во Христа и любовь ко Отечеству стяжав, благоплодное прозябение честных родителей явился еси. Сего бо ради, Божию дару тезоименит, стране своей в скорбныя времена браней против иноплеменных показался еси. Ибо, праведным воеводам подражая, не числом и уменим токмо, но паче верою враги побеждал еси, силу благочестия истиннаго показуя. Темже любовию к тебе распаляеми, воспеваем многия добродетели твоя: велию лювовь ко Господу и ближним, зане тех ради живот полагал еси, чистоту ангелоподобную, тако вся воздержанием удивил еси, нестяжание истинное, ибо благая и красная мира сего презрел еси. Ей, преблаженне Феодоре, угодниче Божий и благоверный болярине царей православных, призри на убогое моление наше, из греховнаго плена к тебе возносимое. Приклони на мать Господа нашего Иисуса Христа, да не воздаст по делам нашим, но обаче дарует грехов оставление, избавит от злых, находящих на ны, и подаст властем нашем и народу усердное попечение, воинству мужество во ратех, народу благочестие трезвенное. И сподобит нас достигнути безмятежнаго пристанища во Царствии Небеснем, идеже со всеми святыми прославляти будем всесвятое имя Отца и Сына и Святаго Духа во веки веков. Аминь».

• Молитва праведному Феодору Ушакову о наступлении мирных времен, даровании мужества и веры. «Приникни, праведне воине Феодоре, с горних селений на притекающих к тебе и вонми молению их: умоли Господа Бога даровати всем нам еже ко спасению нашему мы просим от него, при святем твоем предстательстве. Ты великое, возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив супостатов множества, и на нас ополчающихся всех видимых и невидимых врагов низложи. Умоли Господа Бога даровати крепкий и ненарушимый мир и земли плодоносие, пастырем святыню, законам правду и силу, военачальникам мудрость и доблесть непобедимую, градоначальникам суд, флоту твоему российскому и всему воинству нашему преданность вере и Отечеству и неодолимое мужество, всем же православным христианам здравие и благочестие. Сохраняй страну нашу российскую и обитель сию святую от всех наветов вражиих, да словом и делом прославляется в них всесвятое имя Отца, и Сына, и Святаго Духа, ныне, и присно, и во веки веков. Аминь».

Святитель Тихон (Беллавин), патриарх Московский и всея России (1925)

Святителю Тихону, патриарху Московскому и Всея Руси, молятся о покровительстве монахам-просветителям, миссионерам и катехизаторам, помощи в различных искушения и гонениях, для успехов в учебе.

• Тропарь святителю Тихону, патриарху Московскому и Всея Руси, глас 1. «Апостольских преданий ревнителя и Христовы Церкве пастыря добраго, душу свою за овцы положившаго, жребием Божиим избраннаго Всероссийскаго Патриарха Тихона восхвалим и к нему с верою и упованием возопиим: предстительством святительским ко Господу Церковь Русскую в тишине соблюди, расточенная чада ея во едино стадо собери, отступившия от правыя веры к покаянию обрати, страну нашу от междоусобныя брани сохрани и мир Божий людем испроси».

• Ин тропарь святителю Тихону, патриарху Московскому и Всея Руси, глас 3. «В годину тяжкую Богом избранны в совершенной святости и любви Бога прославил еси, во смирении величие, в простоте и кротости силу Божию являя, положил душу за Церковь, за люди своя, исповедниче патриарше святе Тихоне, моли Христа Бога, Емуже сораспялся еси, и ныне спасти землю Русскую и паству Твою».

• Кондак святителю Тихону, патриарху Московскому и Всея Руси, глас 2. «Тихостию нрава украшен, кротость и милосердие кающимся являяй, во исповедании Православныя веры и любве ко Господу тверд и непреклонен пребыл еси, святителю Христов Тихоне. Молися о нас, да не разлучимся от любве Божия, яже о Христе Иисусе, Господе нашем».

• Молитва святителю Тихону, патриарху Московскому и Всея Руси, о покровительстве монахам-просветителям, миссионерам и катехизаторам, помощи в различных искушения и гонениях, для успехов в учебе. «О пастырю наш добрый, святый великий Патриарше Тихоне, яко град горний ты явился еси - добрая дела твоя и доныне светятся пред человеки. Вемы, яко ты, предстоя престолу Пресвятыя Троицы, велие имаши дерзновение в молитвах пред Господем. Воззри и ныне на нас, грешных и недостойных чад твоих, к тебе бо, яко имущему велие дерзновение пред Творцом всяческих, ныне припадаем и усердно молимся: умоли Господа, да подаст нам решимость стяжать благочестие отцев наших, егоже ты стяжал еси от юности твоея. Ты в житии своем ревностный защититель и хранитель истинныя веры был еси, помози и нам незыблемо соблюсти веру Православную. Тихая бо душа твоя зело преуспела в божественном смиренномудрии, научи и нас разум наш питати не многомятежной мудростию человеческой, но смиренным познанием воли Божией. Ты пред лицем лютых врагов Христовых Истиннаго Бога дерзновенно исповедал еси, молитвою своею укрепи нас, малодушных, да и мы всегда и всюду противостанем духу безбожия и льсти. Ей, угодниче Божий, не презри нас, молящихся тебе, ибо не токмо от бед и скорбей избавления просим, но силы и твердости, великодушия и любви просим, дабы переносить оныя напасти, востающия на ны. Испроси нам неослабное терпение даже до конца жития нашего, мир с Господом и грехов отпущение. Отче святый! Укроти в стране нашей ветры неверия и смуты, да водворит Господь на Земле Российстей тишину и благочестие и любовь нелицемерную. Молитвами твоими да сохранит ю от междоусобныя брани, да укрепит Святую Церковь нашу Православную, да не оскудеет она истинными пастырями, добрыми делателями, право правящими слово Евангельской истины. Упаси и заблуждения овцы стада Христова. Наипаче же моли Господа сил, да возродится Русская Земля святым покаянием и единым сердцем и едиными усты прославит Дивнего во святых Своих Бога в Троице славимаго, Отца и Сына и Святаго Духа во веки веков. Аминь».

Святитель Стефан (Великопермский), епископ Пермский (1396)

Святителю Стефану Пермскому молятся для вразумления язычников, иноверцев и сектантов, об избавлении от скорбей и напастей.

• Тропарь святителю Стефану Пермскому, глас 4. «Божественным желанием, от юнаго возраста, Стефане премудре, разжегся, ярем Христов взял еси, и людей оляденевшая древле неверием сердца, Божественное семя в них сеяв евангельски духовне породил еси. Тем же преславную твою память почитающе, молим тя: моли, Егоже проповедал еси, да спасет души наша».

• Кондак святителю Стефану Пермскому, глас 6. «Самозванен не ищущым тебе святителю обрелся еси, люди от идольския лести свободив, ко христове вере привел еси, и волхва пансотника посрамил еси: темже и первый епископ и учитель Перми был еси. Сего ради духовная твоя чада, яко тобою избавльшеся от идол, благодарная тебе возопием: радуйся Стефане, учителю премудрый».

• Молитва святителю Стефану Пермскому для вразумления язычников, иноверцев и сектантов. «О Богоосвященный и равноапостольный Стефане, новый боговедения проповедниче и просветителю Крещением святым великопермских во идолопоклонстве живущих людей, ко истинному Евангельскому свету путеводителю, пастырю добрый и учителю премудрый, Духа Святаго сосуде избранный, Христоподражательный в небесный Сион наставниче и руководителю, образ благонравия всем благочестно жити желающим, благоискусный мысленнаго корабля, чрез море мира сего к небесному пристанищу плавающаго, правителю, дивный во иерарсех, увенчанный Божественною благодатию, всероссийский светильниче, великий чудотворче и молитвенниче теплый! К тебе во умилении души и сокрушении сердца моего, аз окаянный и грешный (имя рек) благонадежно притекаю и пред чудотворным твоим гробом, в немже святыя мощи твоя почивают, вопию, прося смиренно помощи твоея и теплаго ко Преблагому Богу ходатайства, да твоими богоприятными молитвами испросиши ми от Него человеколюбную милость, оставление многих моих согрешений, души и телеси здравие со спасением; и, яко Благ и Человеколюбец, да благоволит безбедно в мире сем ходити ми до скончания живота моего, во время же разлучения моего от жизни сея дух мой в покаянии и мире Ангелом Своим святым милостивно прияти, и да даст ми мимо мрачных и злоковарных и лютых духов демонских на воздусе проити невозбранно и к Нему непостыдно предстати поклонитися, и безсмертныя и блаженныя жизни сподобитися со всеми святыми во веки. Аминь».

• Молитва святителю Стефану Пермскому об избавлении от скорбей и напастей. «О равноапостольный святителю Христов Стефане! К тебе мы, окаяннии, благонадежно притекаем и пред святым твоим образом вопием, просяще помощи твоея и к Богу ходатайства, да твоими молитвами испросиши нам, рабам Божиим (имена рек), от Него милость: оставление многих наших согрешений, душам и телесем здравие со спасением; да благоволит же Господь твоими молитвами безбедно в мире сем ходити нам до скончания жития нашего, во время же разлучения нашего от жизни сея дух наш ангелы Своими в покаянии и мире милостивно да приимет, яко да от мрачных и злоковарных и лютых духов демонских на воздусе прошедше невозбранно, к Нему непостыдно предстанем и поклонимся, и безсмертныя и блаженныя жизни сподобимся, со всеми святыми, во веки веков. Аминь».

Преподобный Сергий Радонежский, игумен (1392)

Преподобному Сергию Радонежскому молятся об охранении жизни воинов на поле брани, о помощи в трудном учении, об успехах в работе, об избавлении от гордости, об исцелении болезни.

• Тропарь преподобному Сергию Радонежскому, глас 4. «И же добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником: темже и вселися в тя Пресвятый Дух, Егоже действием светло украшен еси: но яко имея дерзновение ко Святей Троице, поминай стадо, еже собрал еси, мудре, и не забуди, якоже обещался еси, посещая чад твоих, Сергие Преподобне отче наш».

• Кондак преподобному Сергию Радонежскому, глас 8. «Христовою любовию уязвився, Преподобне, и тому невозвратным желанием последовав, всякое наслаждение плотское возненавидел еси, и яко солнце отечеству твоему возсиял еси, тем и Христос даром чудес обогати тя. Поминай нас, чтущих пресветлую память Твою, да зовем ти: Радуйся, Сергие Богомудре».

• Величание преподобному Сергию Радонежскому. «Ублажаем тя, преподобне отче Сергие, и чтим святую память твою, наставниче монахов и собеседниче ангелов».

• Молитва преподобному Сергию Радонежскому об охранении жизни воинов на поле брани. «О священная главо, преподобне и богоносне отче наш Сергие, молитвою твоею, и верою и любовию, яже к Богу, и чистотою сердца, еще на земли во обитель Пресвятыя Троицы душу твою устроивый, и ангельскаго общения и Пресвятыя Богородицы посещения сподобивыйся, и дар чудодейственныя благодати приемый, по отшествии же твоем от земных, наипаче к Богу приближивыйся и небесныя силы приобщивыйся, но и от нас духом любве твоея неотступивый, и честныя твоя мощи, яко сосуд благодати полный и преизливающийся, нам оставивый! Велие имея дерзновение ко всемилостивому Владыце, моли спасти рабы Его, сущей в тебе благодати Его верующия и к тебе с любовию притекающия. Помоги нам, да благоуправляемо будет Отечество наше в мире и благостоянии, и да покорятся под ноги его все сопротивнии. Испроси нам от великодаровитаго Бога нашего всякий дар, всем и коемуждо благопотребен: веры непорочны соблюдение, градов наших утверждение, мира умирение, от глада и пагубы избавление, от нашествия иноплеменных сохранение, скорбящим утешение, недугующим исцеление, падшим возставление, заблуждающим на путь истины и спасения возвращение, подвизающимся укрепление, благоделающим в делах благих преспеяние и благословение, младенцем воспитание, юным наставление, неверующим вразумление, сиротам и вдовицам заступление, отходящим от сего временнаго жития к вечному благое уготовление и напутствие, отшедшим блаженное упокоение, и вся ны споспешествующими твоими молитвами сподоби, в день Страшнаго Суда шуия части избавитися, десныя же страны общники быти и блаженный оный глас Владыки Христа услышати: приидите, благословеннии Отца Моего, наследуйте уготованное вам Царствие от сложения мира. Аминь».

• Молитва преподобному Сергию Радонежскому об успехах в работе. «О преподобне и богоносне отче наш Сергие! Воззри на нас (имена рек) милостивно и, к земли приверженных, возведи к высоте небесней. Укрепи наше малодушие и утверди нас в вере, да несомненно уповаем получити вся благая от благосердия Владыки Бога молитвами твоими. Испроси предстательством твоим всякий дар всем и коемуждо благопотребен и вся ны споспешествующими твоими молитвами сподоби в день Страшнаго суда шуия части избавитися, десныя же страны общники быти и блаженный оный глас Владыки Христа услышати: приидите, благословеннии Отца Моего, наследуйте уготованное вам Царствие от сложения мира. Аминь».

• Молитва преподобному Сергию Радонежскому об исцелении болезни. «О небеснаго гражданине Иерусалима, Преподобне отче Сергие! Воззри на нас милостиво и к земли приверженных возведи к высоте небесней. Ты горе, на Небеси; мы на земли, низу, удалены от тебе, не толико местом, елико грехами своими и беззакониями; но к тебе, яко нам сродному, прибегаем и взываем: настави нас ходити путем твоим, вразуми и руководствуй. Свойственно есть тебе, отче наш, благоутробие и человеколюбие: на земли живущу, не о своем токмо спасении бысть тебе попечение, но и о всех к тебе притекающих. Наставления твоя быша трость книжника скорописца, на сердце каждаго глаголы жизни начертавающая. Не телесныя токмо врачевал еси болезни, но паче душевных врач изящный явился еси, и вся твоя святая жизнь бысть зерцало всякия добродетели. Аще толик был еси, святче Божий, на земли: колик ныне еси, на Небеси! Ты днесь предстоиши Престолу Света Неприступнаго, и в нем, яко в зерцале, зриши вся наша нужды и прошения; ты водворяешися вкупе со Ангелы, о единем грешнице кающемся радующимися. И человеколюбие Божие есть неистощимо, и твое к Нему дерзновение много: не престани о нас вопия ко Господу. Испроси предстательством твоим у Всемилостиваго Бога нашего мир Церкви Его, под знамением Креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Аще бо и недостойни есмы толикаго отца и ходатая, но ты, подражатель быв человеколюбия Божия, сотвори ны достойны чрез обращение от злых дел к благому житию. Вся Богопросвещенная Россия, твоими чудесы исполненная и милостями облагодетельствованная, исповедает тя быти своего покровителя и заступника. Яви древния милости твоя, и ихже отцем вспомоществовал еси, не отрини и нас, чад их, стопами их к тебе шествующих. Веруем, яко духом нам соприсутствуеши. Идеже бо есть Господь, якоже слово Его учит нас, тамо и слуга Его будет. Ты верный еси раб Господень, и Богу везде сущу, ты в Нем еси, и Он в тебе есть, паче же и телом с нами еси. Се нетленныя и живоносныя твоя мощи, яко сокровище безценное, вручи нам чудес Бог. Предстояще им, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременну в нуждах наших помощь. Укрепи нас, малодушных, и утверди нас в вере, да несомненно уповаем получити вся благая от благосердия Владыки молитвами твоими. Паству же твою духовную, тобою собранную, не престани управляти жезлом духовныя мудросте: подвизающимся помоги, разслабленныя возстави, споспеши иго Христово несть во благодушии и терпении, и всех нас управи в мире и покаянии скончати живот наш и преселитися со упованием в блаженная недра Авраамова, идеже ты радостно по трудех и подвизех ныне почиваеши, прославляя со всеми святыми Бога, в Троице славимаго, Отца, и Сына, и Святого Духа. Аминь.

• Молитва преподобному Сергию Радонежскому для защиты от врагов, от гордыни. «О священная главо, Преподобне отче, преблаженне Авво Сергие великий! Не забуди убогих своих до конца, но поминай нас во святых своих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имея дерзновение к Небесному Царю, не премолчи за ны ко Господу и не презри нас, верою и любовию чтущих тя. Поминай нас, недостойных у Престола Вседержителева и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо и телом преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих, и всякия прелести бесовския, и козней диавольских, пастырю наш добрый; аще бо и мощей твоих рака пред очами нашима видима есть всегда, но святая твоя душа со ангельскими воинствы, со безплотными лики, с Небесными Силами, у Престола Вседержителя предстоящи, достойно веселится. Ведуще бо тя воистинну и по смерти жива суща, тебе припадаем и тебе молимся, еже молитися о нас Всесильному Богу о пользе душ наших, и испросити время на покаяние, и о невозбранном преитии от земли на Небо, мытарств же горьких, бесов, воздушных князей и вечныя муки избавитися, и Небесному Царствию наследником быти со всеми праведными, от века угодившими Господу нашему Иисусу Христу. Емуже подобает всякая слава, честь и поклонение со Безначальным Его Отцем, и с Пресвятым, и Благим, и Животворящим Его Духом ныне, и присно, и во веки веков. Аминь».

Преподобный Серафим Вырицкий (Муравьев), иеросхимонах (1949)

Преподобному Серафиму Вырицкому молятся для укреплении веры, исцеления от болезней, на удачу в работе.

• Тропарь преподобному Серафиму Вырицкому, глас 4. «Яко великаго молитвенника за землю нашу и утешителя теплаго притекающих к тебе, ублажаем тя, вторый русский отче Серафиме, вся бо яже в мире красная оставил еси, всем сердцем устремился еси к чертогам сладчайшаго Христа и в годину лютых гонений образ кротости и смирения всем был еси: не престай и ныне молитися за ны, да в терпении обрящем путь покаяния и с тобою выну славим Пресвятую Троицу».

• Кондак преподобному Серафиму Вырицкому, глас 5. «Подражая богоносному угоднику Саровскому, Духа Святаго благодать обильно стяжал еси: Александро-Невския Лавры крине благоуханный, Вырицкия веси похвало, сего ради и мы тебе зовем: Радуйся, преподобне Серафиме, милостивый наш предстателю пред Господем».

• Величание преподобному Серафиму Вырицкому. «Ублажаем тя, преподобне отче Серафиме, и чтим святую память твою, наставниче монахов и собеседниче ангелов».

• Молитва преподобному Серафиму Вырицкому для укреплении веры, исцеления от болезней, на удачу в работе. «О богоблаженный и премилосердый отче наш Серафиме! Ведуще тя и по смерти яко жива суща, с верою припадаем ти и вопием: не забуди убогих твоих до конца, но милостивно призри на стадо твое духовное и упаси е, добрый пастырю, благоприятными твоими к Богу молитвами. Испроси нам от Господа время на покаяние и греховныя жизни исправление, веси бо вся немощи наша душевныя: не имамы дел веры и спасения, не имамы ревности ко истинному богоугождению, пленихомся умом в погибельных страстех, растлехом сердца во гнусных похотех. Что убо чаем и на что надеемся, неключимии, разоривше храмины душ наших. Ей, святый отче, простри молитвенно руце твои ко Господу и умоли Спасителя рода человеческаго коснутися благодатию окамененных сердец наших, омыти нас слезами покаяния, возставити в вере, укрепити во благочестии и вся полезная ко спасению даровати. Не посрами упования нашего, еже по Бозе и Богородице на тя возлагаем, но буди нам скорый помощник, утешитель в скорбех и покровитель во обстоянии, да сподобимся молитвами твоими наследовати Царствие Небесное, идеже вси святии непрестанно славят и воспевают пречестное и великолепое имя Отца, и Сына, и Святаго Духа, ныне и присно и во веки веков. Аминь».

Преподобный Павел Ростовский, Борисоглебский, игумен (1394), и Святитель Феодор, архиепископ Ростовский (1409)

Преподобным Феодору и Павлу Ростовским молятся для защиты от врагов.

• Тропарь преподобным Феодору и Павлу Ростовским, глас 8. «Звездам заря послушания жизнь лучших показа, яко два светила сияюще нам, Феодор и Павел Богомудрии, Ростовская похвало, житием чистым Богу присвоишася».

• Кондак преподобным Феодору и Павлу Ростовским, глас 2. «Волнений множество невлажно проходяще, безплотныя враги струями слез ваших крепко погрузили есте, богомудрии и преподобнии, и чудес дар приимше, молите непрестанно о всех нас».

• Величание преподобным Феодору и Павлу Ростовским. «Ублажаем вас, преподобнии отцы Феодоре и Павле, и чтим святую память вашу, наставницы монахов и собеседницы Ангелов».

• Молитва преподобным Феодору и Павлу Ростовским для защиты от врагов. «О преподобнии отцы, пастырие и учителие наши, блаженнии авво Феодоре и авво Павле! В лета древняя путем заповедей Господних шествовати изволивше, притекли есте в место пустынное, идеже благословением и молитвами началовождя своего, преподобнаго и Богоноснаго Сергия, чудотворца Радонежскаго, преславную обитель святых страстотерпцев Бориса и Глеба возградили есте, во устроение благочестия иноческаго жительства, и противу невидимых врагов спасения нашего тамо подвизастеся, и тако угодницы бысте Богови, верою, надеждою и любовию благолепне украшающеся, постом же и бдением и молитвами Богу благоугождающе, и во всяком благочестии ко временному житию и вечному спасению образи нам явлынеся. И ныне убо, преподобнии отцы наши, не забудите посещати чада своя, во еже отразити от нас наветы вражия: наставите же и утвердите нас в подвизех добрых, к жизни вечней души наша руководствующе. Молитеся милости Подателю и Господу всяческих, да спасет нас, имиже весть судьбами, и наследники сотворит с вами вечнаго наслаждения, да непрестанно славим Всесвятое имя Отца, и Сына, и Святаго Духа в безконечныя веки веков. Аминь».

Святитель Феодор, епископ Ростовский и Суздальский (1023), и Иоанн, епископ Суздальский (1373)

Святителям Феодору и Иоанну, епископам Ростовским и Суздальским, молятся о помощи в скорбях и печалях.

• Тропарь святителям Феодору и Иоанну, епископам Ростовским и Суздальским, глас 8. «Яко апостолом единонравных учителей Суждальския страны, и целителей душ и телес премудрых, и служителей Богу благоприятных, к ракам честных мощей ваших притекающе, ублажаем вас, святителие Богоблаженнии, Феодоре и Иоанне, в песнех же и пениих, радующеся, славим Христа, даровавшаго вам благодать исцелений и граду нашему Суждалю великое в вас утверждение».

• Ин тропарь святителям Феодору и Иоанну, епископам Ростовским и Суздальским, глас 8. «Яко апостолом единонравнии, и учителие Судальстей стране, и целителие душам и телесем предобрии, и служителие Божий благоприятный, к ракам честных мощей ваших притекающе, святителю великий Иоанне и Феодоре Богоблаженнии, сошедшеся днесь, любовию память вашу светло празднуем в песнех и пениих, радующеся и Христа славяще, Иже таковую благодать даровавшаго исцелений и граду Суждалю великое утверждение».

• Кондак святителям Феодору и Иоанну, епископам Ростовским и Суздальским, глас 8. «Яко добродетелей учители, молитвами вашими подаете чтущим вас любовию добродетелей исправление и соблазнов избавление».

• Ин кондак святителям Феодору и Иоанну, епископам Ростовским и Суздальским, глас 8. «Божественных и пречестных святителей Христовых и чудотворцев Иоанна и Феодора, вернии, поюще, да ублажим, яко днесь, в память их притекающе к ракам мощей их, молим многообразных нас обстояний избавити, да вопием вам: Радуйтеся, граду нашему и Церкви Христовей великое утверждение».

• Величание святителям Феодору и Иоанну, епископам Ростовским и Суздальским. «Величаем вас святителие велиции, и чтем святую память вашу: вы бо молите за нас Христа Бога нашего».

• Молитва святителям Феодору и Иоанну, епископам Ростовским и Суздальским, о помощи в скорбях и печалях. «О велицыи угодницы Христови и чудотворцы, святителие Феодоре и Иоанне! Се мы недостойнии и грешнии скорбьми многими угнетаемии, к вам усердно прибегаем, и с упованием крепким молимся: отцы богомилостивии и благопослушливии, милостивно услышите ныне глас наш молебный, и потщитеся на помощь нашу, и яко при жизни вашей всем скорбящым и озлобленным помощницы и утешителие бысте, тако и ныне любовь вашу к нам явите, благодатным действом благоприятных молитв ваших, претворяюще скорбь нашу в радость, печаль же на утешение: вся бо можете о укрепляющем вас Христе, Егоже вернии служители бысте; от Негоже приявше вся обетования благая, низпошлите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне и присно и во веки веков. Аминь».

Преподобный Петр Ордынский, Ростовский, царевич (1290)

Преподобному Петру Ордынскому, царевичу Ростовскому, молятся о прощении грехов и укреплении веры, от телесных и душевных хворей.

• Тропарь преподобному Петру, царевичу Ростовскому, глас 8. «Отечества своего, блаженне Петре, удалився, и богомерзкую веру отнюд возненавидев, от тмы во свет пришел еси и вселился еси во славный и многонародный град Ростов, в немже житие честно пожив, церковь во имя святых апостол Петра и Павла воздвигл еси Христовою благодатию, и сию чудными иконами, яко невесту, украсив, святителя же, и князя, и вся люди житием своим удивил еси, темже и по смерти твоей Христос даром чудес обогати тя. Поминай нас, чтущих пресветлую память твою, преподобне отче Петре, и моли Христа Бога спастися душам нашым».

• Кондак преподобному Петру, царевичу Ростовскому, глас 4. «Явися велие солнце Христовой Церкви, просвещая учения светлостьми, всечестне, яко черпалом златым, от кладезя неископаннаго чудес почерпл еси, от источника неистощимаго, на память успения твоего пришедшим, всеблаженне Петре, ныне всем подаваеши грехов прощение, славо преподобным».

• Величание преподобному Петру, царевичу Ростовскому. «Ублажаем тя, преподобне отче Петре, и чтим святую память твою, наставниче монахов и собеседниче ангелов».

• Молитва преподобному Петру, царевичу Ростовскому, о прощении грехов и укреплении веры. «О преблаженне и преподобне Петре царевиче, Ростовский чудотворче! Якоже из мрака языческаго во свет Евангельскаго учения Господь тя призва: тако умоли Его, да и нас по неизреченней Своей благости и человеколюбию измет всесильною Своею Десницею из тмы греховныя, и осияет сердца наша к деланию Его божественных заповедей. Якоже ты избег мятежа мирских волнений, во ангелоподобное безпечальное житие сподобился еси достигнути, тако сподоби и нам грешным моря сего, влаемаго страстьми, пучину безмятежно преплыти, имея тя, отче, кормчаго о Господе нашем, и достигнути чистым покаянием ко пристанищу спасения вечнаго. И якоже имел еси споспешников тебе верховных апостолов Петра и Павла в созидании обители, тако подвигни их умилосердитися и о нас недостойных, и даровати нам от сугубыя апостольския благости дерзновение ко Христу Богу. Веруем бо, яко аще мощи твоя святыя и сокровенны в земли, но ты царствуеши со избранными Божиими на небеси: исходатайствуй убо, да и нам грешным молитвами твоими, да отверзется дверь Царствия Небеснаго в безконечныя веки. Аминь».

• Молитва преподобному Петру, царевичу Ростовскому, от телесных и душевных хворей. «О преподобне отче Петре царевиче, душею на небеси Престолу Божию предстоиши и Троичныя славы наслаждаешися, телом же на земли в божественном храме сем почиваяй, и данною ти свыше благодатию различная источаяй чудеса, призри милостивым оком на предстоящыя честней твоей раце люди и просящыя умильно твоея помощи: се бо мы безмерными согрешении праведный гнев Божий на ся наведохом, и всякия милости недостойни сотворихомся. Тем же не смеюще вознести очеса наша к высоте небесней, ниже молебный глас ко Господу, сердцем сокрушенным и смиренным духом тебе в ходатайство и на помощь призываем. Яко стяжавый дерзновение ко Господу, испроси: Страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш. Избави всех, верою несомненною к Богу приходящих, и к раце мощей твоих прибегающих, от всяких бед душевных и телесных. Буди печальным утешитель, недугующым врач, напаствуемым помощник, вдовицам заступник, сирым защитник, младенцам питатель, странствующым путевождь, старым укрепление, плавающым кормчий. Исходатайствуй всем, твоея помощи требующым, вся, яже ко спасению полезная, яко да твоими молитвами наставляеми, путь маловременнаго жития безбедне совершим, улучим на Небеси вечный покой, и прославим всех благих Дателя, в Троице славимаго Бога, Отца, и Сына, и Святаго Духа, ныне и присно и во веки веков. Аминь».

Преподобный Паисий Галичский, архимандрит (1460)

Преподобному Паисию Галичскому от бесовских искушений и защиты от врагов.

• Тропарь преподобному Паисию Галичскому, глас 8. «Днесь возсия нам память твоя, славне Паисие, яко солнце светозарное, лучами озаряющи весь мир, тако и ты, преподобне, чудесы своими тьму нощи злых духов от нас отгоняя; днесь Небесныя силы, и святых Ангел, и души праведных мысленно торжествуют, радующеся; днесь и мы, грешнии, припадающе честному твоему образу молимся: о, преподобне Паисие, Христа Бога моли непрестанно спасти град и люди, иже тебе почитающия».

• Кондак преподобному Паисию Галичскому, глас 3. «Возсия, Господи, граду Твоему Галичу, яко светозарное солнце, угодник Твой Паисий, радостно вселенную озаряя своими чудесы, и приходящих с верою ко гробу его святому. Тако молитвами Пречистыя Богородицы от бед всех нас избави, и упраздни варварская шатания, яко мы, люди Твои, Господи, и град наш и стране вельми Тобою хвалится, и спасается молитвами преподобнаго Паисия».

• Величание преподобному Паисию Галичскому. «Ублажаем тя, преподобне отче Паисие, и чтим святую память твою, наставниче монахов и собеседниче ангелов».

• Молитва преподобному Паисию Галичскому от бесовских искушений и защиты от врагов. «О, священная главо, преподобне отче, преблаженне авво Паисие великий! Не забуди нищих своих до конца, но поминай нас всегда во святых своих и благоприятных молитвах к Богу. Помяни стадо свое, еже сам упасл еси, и не забуди посещати чад своих, моли за ны, отче наш, и ныне за дети своя духовныя, яко имеяй дерзновение к Небесному Царю, не премолчи за ны, вопия ко Господу, и не презри нас, верою и любовию чтущих тя, но поминай нас, недостойных, у Престола Вседержителева, и не престай моляся за нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо и телом преставился еси от нас, но и по смерти убо жив сый пребывавши неотступно от нас духом, сохраняя нас от стрел вражиих и всякия прелести бесовския и козней диавольских. Пастырю наш добрый, аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными силами у Престола Вседержителева предстоящи, достойно веселится. Нам бо ведущим убо тя воистинну и по смерти яко живу ти сущу, тебе припадаем и тебе молимся и тебе мили ся деем, еже молитися о нас всесильному Богу о пользе душ наших и испросити нам время на покаяние, и невозбранно прейти от земли на небо, от мытарств же горьких, бесов и воздушных князей, и от вечныя муки избавитися, и Небесному Царствию наследником быти со всеми, идеже от века угодившими Господу нашему Иисусу Христу, Емуже подобает всякая слава, честь и поклонение со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь».

Преподобный Никодим Кожеезерский, Хозьюгский (1640)

Преподобному Никодиму Кожеезерскому молятся от бесовских искушений, для укрепления веры, от бед и напастей.

• Тропарь преподобному Никодиму Кожеезерскому, глас 8. «От царствующаго града пресельник явися и яже в нем великия обители и, промышлением Божественнаго разума окормляемь, к морским странам устремися, вселися же в пустыню, уклоняяся мирския молвы, и силою Святаго Духа вооружился еси, крестным оружием враги своя прогоняя, постом и непрестанною молитвою жизнь свою совершая, сревнуя великим отцем Антонию, и Онуфрию, и Павлу Фивейскому, с нимиже Господеви молися, отче Никодиме, спастися душам нашим».

• Ин тропарь преподобному Никодиму Кожеезерскому, глас 4. «Яко безплотен, отче, пожил еси на земли, смирением и в яме пребыванием с молитвами превозносящегося врага смирил еси, яко крин, воистинну процвел еси, избранный кинамон, и высокий кипарис, и плодовитая маслина, и финике сладкий, и кедр благоуханный, и валсам чистый, терние злострастия искоренил еси и жилище Всесвятаго Духа был еси, темже поминай память твою днесь празднующих, Никодиме чудотворче, да вси радостными гласы воспеваем Христа Бога нашего, Иже тебе даровавшаго исцелений благодать».

• Кондак преподобному Никодиму Кожеезерскому, глас 2. «Пустыню, яко царский чертог, усердно возлюбил еси, в нейже жестокое показа житие много летным пребыванием, очистив свою душу и ум от страстей, и сего ради Святаго Духа предивно приятелище бысть, Никодиме преподобне, Егоже действием и чудесы обогатился еси, темже и мы почитаем подвиги твоя, всеблаженне, но, яко имеяй дерзновение ко Пресвятей Троице, молися непрестанно о всех нас».

• Ин кондак преподобному Никодиму Кожеезерскому, глас 8. «Укрепляемь силою Креста и благодатию, преобидев тленная и долу влекущая мудрования, отче, бесов посрамил еси, к Вышнему течение получил еси, устремился еси в Хозьюгу пустыню, Пресвятей Троице жилище был еси, Ейже предстоя, моли о нас, почитающих тя, да возопиим ти: радуйся, преблаженне Никодиме, отче наш».

• Величание преподобному Никодиму Кожеезерскому. «Ублажаем тя, преподобне отче Никодиме, и чтим святую память твою, наставниче монахов и собеседниче ангелов».

• Молитва преподобному Никодиму Кожеезерскому от бесовских искушений, для укрепления веры. «О преподобне, треблаженне, досточудне, всечестне и благоугодне отче Никодиме, ты возжелел еси усердно шествовати вслед Владыки Христа, вся мирская мудрования отринув, монашества путь предъизбрал еси, телесная чувства во внутренних пустынях сих затворив, при водах вселился еси, во слезах и трудех пребывая, многолетнее время в подвизе, и терпении, и озлоблении мнозе ангельски житие препроводил еси, сего ради Свет невечерний зрети сподобился еси, Пресвятей Троице со всеми святыми предстоиши, непрестанно насыщаяся зрением Божества Трисветлаго. Поминай чтущих пресветлую память твою и труды твоя и терпение любочестне чтущих, яко вседневно в пустыни сей за Христа подъял еси. О всепреподобне отче наш, не промолчи, Господу моляся о обители, при нейже подвизался еси и честным и трудолюбным твоим мощем положится благоволил еси, и не остави, посещая нас, чад своих, но вразуми, окорми и к пути спасения настави, к подвигу укрепи, уныние и леность отжени, Божиим страхом сердец наших услужение разжзи, окамененное нечувствие и страстное души разслабление уврачуй, ярость и двизание телесное успи, умную слепоту и омрачение просвети и к безропотней стези покаяния направи, все житие наше одобри и к преуспеянию добродетелей утверди, юныя целомудрию накажи, старыя безраскаянно совершити подвиг вооружи, во скорбех сущия утеши и исцели, напаствуемыя заступи и демонское искушение отврати и всем полезная даруй, яко да возможем, твоим предстательством и молитвами сохраняеми подвига течение непреткновенно совершити, славяще Святую Троицу, Отца, и Сына, и Святаго Духа, в Трех Ипостасех поклоняемаго Бога, ныне и присно и во веки веков. Аминь».

• Молитва преподобному Никодиму Кожеезерскому от бед и напастей. «О преподобне отче наш Никодиме, услыши мя, грешнаго раба твоего (имя рек), молящагося тебе, и святому твоему образу покланяющагося, к чудотворному твоему гробу притекающаго, и в молитве из глубины сердца своего призывающаго в помощь и защищение себе святое твое имя, милостив буди и милосерд, скор молебник и ходатай о мне, грешном рабе своем, ко Вседержителю Господу, в Триех Ипостасех поклоняемому Богу, к Немуже дерзновение имея, моли за мя грешнаго и за весь мир православно-христианскаго рода, еже возникати горе ко взысканию Небеснаго Отечества и свободитися в жизни сей от всяких одержащих скорбей и злоскорбных бед и напастей, от злолютаго оклеветания и наития злых человек и злопомышлений и от враг видимых и невидимых, да, сотворше волю Божию, приимем славы неувядаемый венец, зде же твою память чтуще, радостно прославим Прославльшаго тя Царя Небеснаго, Отца, и Сына, и Святаго Духа, Бога Трисвятаго. Аминь».

• Молитва преподобному Никодиму Кожеезерскому покаянная о спасении души. «Иже благодатию Святыя Троицы, преподобне и всеблаженне отче наш Никодиме, святаго ради жития твоего пустыннаго в дивных девственных подвизех и плоти умерщвлениих, в себе вшед, непотребный аз и ложный твой ученик, и раб ленивый, и господин греха, и сосуд всяческия нечистоты (имя рек), со слезами и стенанием сердца тебе от скверных устен моих и от языка мерзка исповедание приношу и творю к Богу через тебе покаяние, понеже не имам сердца чиста, сего ради студ лица моего покрывает мя, не имам поста и целомудрия, осквернив ум и душу нелепыми помышлении, плоть осмрадих страстными похотьми, понеже во тщеславии, а не смиренномудрии, елико бо благих творих, вся творив в неразумии, ибо человекоугодия ради, а не боголюбия, не пользы ради ближняго и спасения души своея вся деях, суетный, а не истинный монах, и в безумии все время жития моего изнурив, страстем своим, а не тебе работая, мирстей суете, а не Богу боголепно служив, увы, сердце во ожесточение приведет моими злыми обычаи, и до ныне в нечувствии обретаюся, окамененный, и во обещании к Богу и к тебе лживец являюся. Но помози мне благодатию, данною тебе от Царя Трисоставнаго, се бо к солнцу достигох. О преподобный божественный мой покровителю! Не презри мя до конца погибнути, но милостивно подай ми руку помощи, уже бо ти приближается, и посечение неплодныя моея души готово есть, и ныне молю тя, блаженне отче Никодиме, мил ся дею пред твоим невидимым присутствием, повергаюся у святаго гроба твоего, умоли за мя, достойнаго казни, и умилостиви Владыку Христа за раба недостойнаго, милости просящаго, яко да не посечет мя без времене смертною секирою, яко неплодное древо, не имуще плода добрых деяний, и споспеши ми прочее время живота моего во истинном покаянии скончати, и во время исхода грешную мою душу креста святаго оружием и Приснодевы Богородицы Марии именем защити, и сподоби мя в конец оный страшный безсмертных благ получити и горькия и несказанныя тогдашния нужды, и скорби, и болезни избавитися милостию и непобедимыми щедротами Троицы Пресвятыя, Отца, и Сына, и Святаго Духа. Аминь».

• Молитва преподобному Никодиму Кожеезерскому для защиты от врагов. «О преподобне и богоносне отче наш Ннкодиме! Велие имея к Богу дерзновение, молися выну о всех нас, зане буря многих бед и скорбей обдержит ны: недузи телеснии, болезни душевные, приражения вражия обуревают ны. Ходит бо враг наш, иский кого поглотити, и ежечасно от того уловляемся; о спасении же своем нерадяще, несмы достойни воззрети на высоту небесную. Но ты буди нам помощник скорый и избавитель: яко сам искушен быв от врага, победив же сего доблественне, вразуми ны, да разумеем того ковы и приражения. Подаждь убо нам память смертную, слезы покаяния и надежду спасения, да не в отчаяние впадем, ниже дерзостным на милосердие Божие упованием, во гресех же пребыванием в конец себе погубим, но да будет нам память грехов наших во источник теплых слез и сокрушения сердечнаго, милосердие же Божие и благодать Его, молитвами твоими, во спасение наше, ныне и присно и во веки веков. Аминь».

Преподобный Никита Столпник, Переяславский (596)

Преподобному Никите Столпнику, Переславльскому чудотворцу, молятся о прогнании лукавых духов, об исцелении в расслаблении тела с бессонницей, потерей аппетита и лишением каких-либо членов.

• Тропарь преподобному Никите Столпнику, глас 4. «Христову мученику тезоименит был еси, преподобне, многи подвиги и труды претерпел еси Христа ради, Егоже ради вериги носил еси, блаженне: Того ныне о нас моли, Никито преподобне, душевныя наша и телесныя страсти уврачевати, верою и любовию почитающих присно память твою».

• Кондак преподобному Никите Столпнику, глас 8. «Христа ради от твоих рабов нуждную смерть претерпел еси и венец нетления от Него восприял еси, приходящим же с верою от честнаго твоего гроба подаеши цельбы, о Никито преподобне, молитвенниче о душах наших».

• Молитва преподобному Никите Столпнику для расслабления тела с бессонницей, потерей аппетита и лишением каких-либо членов. «О, всечестная главо, преподобне отче, преблаженне Никито преподобномучениче! Не забуди нищих твоих до конца, но поминай нас всегда во святых своих и благоприятных молитвах к Богу и не забуди посещати чад своих. Моли за ны, отче благий и избранниче Христов, яко имеяй дерзновение к Небесному Царю, и не премолчи за ны ко Господу, и не презри нас, верою и любовию чтущих тя. Поминай нас недостойных у Престола Вседержителева и не престай моляся за нас ко Христу Богу: тебе бо дана бысть благодать молитися за ны. Не мним бо тя мертва суща, аще бо и телом преставился еси от нас, но и по смерти убо жив пребываеши. Не отступай от нас духом, сохраняя и соблюдая нас от стрел вражиих и всякия прелести бесовския, заступниче и молитвенниче наш добрый. Аще бо и мощей твоих рака пред очима нашима видима есть всегда: но святая твоя душа со ангельскими воинствы, со безплотными лики, с небесными силами у Престола Вседержителя Бога достойно веселится. Ведуще убо тя воистину и по смерти жива суща, тебе припадаем, и тебе молимся и мили ся ти деем, еже моли ти ся о нас Всесильному Богу о пользе душ наших, и испроси нам время на покаяние, и невозбранно приити от земли на Небо, и горьких мытарств, и воздушных князей, и вечныя муки избавитися нам, и Небесному Царствию наследником быти со всеми праведными, от века угодившими Ему, Господу нашему Иисусу Христу, Емуже подобает всякая слава, честь и поклонение, со Безначальным Его Отцем и Святым Духом, ныне и присно и во веки веков. Аминь».

Святитель Лука (Войно-Ясенецкий), архиепископ Симферопольский, Крымский (1961)

Святителю Луке, архиепископу Крымскому, молятся о покровительстве врачам, об укреплении веры в гонениях и искушениях.

• Тропарь святителю Луке, архиепископу Крымскому, глас 1. «Возвестителю пути спасительного, исповедниче и архипастырю Крымския земли, истинный хранителю отеческих преданий, столпе непоколебимый, Православия наставниче, врачу богомудрый, святителю Луко, Христа Спаса непрестанно моли веру непоколебиму православным даровати и спасение, и велию милость».

• Кондак святителю Луке, архиепископу Крымскому, глас 1. «Якоже звезда всесветлая, добродетельми сияющи, был еси святителю, душу же равноангельну сотворил еси, сего ради святительства саном почтен был еси, и во изгнании же от безбожных много пострадал еси и непоколебим верою пребыв, врачебною мудростию многия исцелил еси. Темже ныне честное тело твое, от земных недр обретенное дивно, Господь прослави, да вси вернии вопием ти: радуйся, отче святителю Луко, земли Крымския похвало и утверждение».

• Величание святителю Луке, архиепископу Крымскому. «Величаем тя, исповедниче Христов, святителю отче наш Луко, и чтим святую память твою, ты бо молиши о нас Христа Бога нашего».

• Молитва святителю Луке, архиепископу Крымскому, о покровительстве врачам, об укреплении веры в гонениях и искушениях. «О всеблаженный исповедниче, святителю отче наш Луко, великий угодниче Христов. Со умилением приклоньше колена сердец наших, и припадая к раце честных и многоцелебных мощей твоих, якоже чада отца молим тя всеусердно: услыши нас грешных и принеси молитву нашу к милостивому и человеколюбивому Богу, Емуже ты ныне в радости святых и с лики ангел предстоиши. Веруем бо, яко ты любиши ны тою же любовию еюже вся ближния возлюбил еси, пребывая на земли. Испроси у Христа Бога нашего да утвердит чад Своих в духе правыя веры и благочестия: пастырям да даст святую ревность и попечение о спасении вверенных им людей: право верующия соблюдати, слабые и немощныя в вере укрепляти, неведущия наставляти, противныя обличати. Всем нам подай дар коемуждо благопотребен, и вся яже к жизни временней и к вечному спасению полезная. Градов наших утверждение, земли плодоносие, от глада и пагубы избавление. Скорбящим утешение, недугующим исцеление, заблудшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление. Подаждь нам всем твое архипастырское благословение, да таковое молитвенное ходатайство имущи, избавимся от козней лукаваго и избегнем всякия вражды и нестроений, ересей и расколов. Настави нас на путь ведущий в селения праведных и моли о нас всесильнаго Бога, в вечней жизни сподобимся с тобою непрестанно славити Единосущную и Нераздельную Троицу, Отца и Сына и Святаго Духа. Аминь».

Блаженный Исидор Твердислов, Ростовский, Христа ради юродивый (1474)

Блаженному Исидору, Христа ради юродивому, Ростовскому чудотворцу, молятся об урожае огурцов.

• Тропарь блаженному Исидору, глас 1. «Божественною свыше просветився благодатию, Богомудре, многим терпением во временней жизни течение совершил еси, темже и по успении источаеши чудеса иже с верою приходящим к раце мощей твоих, Исидоре всеблаженне. Слава Давшему ти крепость, слава Прославльшему тя в чудесех, слава Действующему тобою всем исцеления».

• Ин тропарь блаженному Исидору, глас 4. «Просветився Божественною благодатию, Богомудре, целомудрием многим и терпением во временней жизни течение добре скончал еси. Тем и по смерти яви тя светлость жития твоего: источаеши бо исцелений благодать иже с верою притекающим ко святому твоему гробу, Исидоре блаженне, моли Христа Бога, да спасет души наша».

• Ин тропарь блаженному Исидору, глас 4. «От земли Воззвавый тя на вечныя обители, соблюдает и по смерти тело твое невредимо, святе Исидоре, ты бо в целомудрии и чистоте жития пожил еси, блаженне, не осквернив своего телесе, темже со дерзновением Христа Бога моли спастися душам нашим».

• Кондак блаженному Исидору, глас 8. «Взбранному и дивному в праведницех, иже убо от Христа дар чудес приимшему, похвальная ныне принесем глаголы, но яко имея дерзновение ко Святей Троице, Юже моли избавитися от бед рабом твоим, да зовем ти: радуйся, Богомудре Исидоре».

• Ин кондак блаженному Исидору, глас 4. «Верою память твою, блаженне, совершающия, соблюдай от всякия злобы и соблазна змиина, имаши бо дерзновение ко всех Владыце, Христу Богу, Егоже моли избавитися от бед и напастей рабом твоим, Богомудре Исидоре».

• Величание блаженному Исидору. «Ублажаем тя, святый праведный Исидоре, и чтим святую память твою, ты бо молиши за нас Христа Бога нашего».

• Молитва блаженному Исидору об урожае огурцов. «О, преблаженный и великий угодниче Христов, святый праведный Исидоре! Восхваляя равноангельское житие твое и преславные от честных мощей твоих истекающие чудеса прославляя, ко святому гробу твоему припадаю смиренно и во умилении зову: Радуйся, пресветлая звездо, от запада притекшая и на восток просиявшая; Радуйся, отринувый неправоверие, уставы же православия до конца соблюдый; Радуйся, бывый яко буй пред очима мира греховнаго, Божией же премудрости некрадомое сокровище стяжавый; Радуйся, суетное и тленное поправый, да восприимеши венец нетленен; Радуйся, терпением древнему Иову уподобивыйся; Радуйся, воине Христов непобедимый, доблестно диавола победивый и все стрелы лукавого разженныя угасивый; Радуйся, многие и дивные цельбы от святого гроба твоего источающий; Радуйся, смиренномудрием богатеющий и чистоты сосуд избранный явивыйся; Радуйся, с верою призывающим тя скорый помощниче и заступниче; Радуйся, яко течение добре скончал еси и веру непорочно соблюл еси, и врагов бесплотных терпением твоим попрал еси, и мирские суетства препобедил еси. Сего ради и святая твоя чистая душа на небеса востече радующися, праведных же лицы сретоша тя веселящеся и небесные селения светло восприяша; блаженное же и честное тело твое на земли пребывает нетленно, верным исцеление подавая. Тем же молим тя, богомудре Исидоре, да ходатайствуеши о нас у Христа Бога, еже пребыти граду сему непоколебиму и безмятежну, правоверному же императору нашему Николаю Александровичу на супостаты победу и одоление даровати и всем православным христианам здравие и благое поспешение подати, да сподобимся вси милости и благодати Господа нашего Иисуса Христа, ему же подобает слава и держава, купно со безначальным отцем и с пресвятым и благим и животворящим его духом ныне и присно и во веки веков. Аминь».

• Молитва блаженному Исидору от врагов. «О, великий угодниче Божий, святый праведный Исидоре! Помози мне, грешному, всегда страстию греховною побеждаемому, ты бо еси предстатель и заступник и скорый помощник в скорбех моих и усердный ходатай спасения моего. Ты верою правой и трудом твоим вечной славы и царствия небеснаго сподобился еси и ныне у престола владыки всех, царя Христа, Бога нашего, предстоиши. Тем же и молю тя, страстотерпче праведный: помяни мя, окаянного, в тине греховной валяющегося, уже бо не могу возвести очи мои к горнему Сиону, зане связан есмь сетьми диавольскими и попечениями житейскими. Избави мя молитвами твоими от всяких злых наветов вражиих и от всякаго зла, да прииму исцеление от язв греховных, от вселютейшаго змея наложенных мне. Все житие мое окаянный аз во сластех мира сего изнурих и не имам помощника, и не вем, к кому прибегнути, да подаст ми руку помощи. Сего ради к тебе прибегаю и сице молюся: О, святый праведный Исидоре! Подаждь ми помощь в день страшнаго суда, егда приидет сын человеческий судити всех, тогда умоли того страшного и нелицемерного судию, да не осудит мя по беззакониям моим, но да поставит одесную себе по велицей милости своей. Помолися, владыце,Христу Богу, да и в нынешнем веке милостив будет нам, грешным и недостойным рабам своим, и да утвердит мысль нашу, еже отвратитися нам от всякаго зла и соблюдати спасительные его заповеди, и прочее время жития нашего прейти в покаянии и соблюдении Божиих заповедей, да, достигше небесных обителей, непрестанно славим единаго триипостасного Бога, отца и сына и святаго духа, ныне и присно и во веки веков. Аминь».

Преподобномученик Адриан Пошехонский, Ярославский, игумен (1550)

Преподобному Адриану, игумену Пошехонскому, молятся о прощении грехов.

• Тропарь преподобному Адриану, игумену Пошехонскому, глас 4. «Аще и смертию нуждною умерл еси, аще и смертная сень внезапу найде на тя, обаче, яко деву мудрую душу твою обрете Христос и в чертог Свой Небесный введе, и со святыми всели, чудесы возвеличив имя твое, Адриане мучениче преподобне, Емуже молитву о нас сотвори, память твою почитающих».

• Ин тропарь преподобному Адриану, игумену Пошехонскому, глас 4. «Христову мученику тезоименитый, многа труды, преподобне, подъял еси терпением твоим, и убиением от окрестных нуждную смерть претерпел еси, и ныне, о преподобный мучениче отче Адриане, моли душевныя и телесныя наша страсти обязати, иже верою и любовию почитающих обретение честных мощей твоих и всечестную память твою».

• Ин тропарь преподобному Адриану, игумену Пошехонскому, глас 4. «Христову мученику тезоименит быв, преподобне, многая труды подъял еси в жизни временней, обитель иноческую созидая в пустыни, идеже от злых разбойников даже до крове пострадал еси и мученическую смерть от них приял еси, Адриане славне. Чудес благодатию обогатився, днесь предстоиши всех Царю, Христу Богу, Егоже моли спастися душам нашим».

• Кондак преподобному Адриану, игумену Пошехонскому, глас 4. «Христа ради, доблественне, претерпел еси и венец от Него восприял еси страдания твоего, приходящим же к тебе с верою от честнаго гроба подаеши цельбы, о преподобне мучениче Адриане приснопамятне, молитвенниче о душах наших».

• Ин кондак преподобному Адриану, игумену Пошехонскому, глас 6. «Житейския молвы избежав, преподобне, в пустыню вселился еси, и, тамо обитель иноков возградив, последи от разбойник мученически пострадал еси, и ныне сияеши нетлением и чудесы, Адриане многострадальне, молитвенниче о душах наших».

• Величание преподобному Адриану, игумену Пошехонскому. «Ублажаем тя, преподобномучениче Адриане, и чтим святую память твою, наставниче монахов и собеседниче ангелов».

• Молитва преподобному Адриану, игумену Пошехонскому, на всякую потребу. «О священная и многострадальная главо, земный ангеле и небесный человече, преподобномучениче и чудотворче Адриане! Припадаем к тебе с верою и любовию и молим ти ся прилежно, яви нам смиренным и грешным святое твое заступление: се бо грех ради наших не имамы свободы чад Божиих, просити о потребах наших Господа и Владыку нашего, но тебе молитвенника благоприятнаго к нему предлагаем и просим тя со усердием многим: испроси нам у благости его благопотребныя дары душам и телесем нашим: веру праву, надежду спасения несомненну, любовь ко всем нелицемерну, во искушениих мужество, в злостраданиих терпиние, в молитвах постоянство, душ и телес здравие, земли плодоносие, воздуха благорастворение, житейских потреб довольство, мирное и безмятежное житие, благую христианскую кончину, и добрый ответ на страшнем суде Христове. Не забуди, святче Божий, и обитель твою святую, тобою созданную и присно тя чтущую, но соблюди ю и всех живущих и подвизающих в ней и на поклонение в ню приходящих невредимыми от искушений диавольских и всякого зла. Ей, преподобномучениче святый! не лиши нас помощи твоея небесныя, но молитвами твоими всех нас приведи в пристанище спасения, и наследники яви нас быти всесветлаго царствия Христова, да поем и славим неизреченныя щедроты Человеколюбца Бога Отца и Сына и Святого Духа, и твое святое заступление во веки веков. Аминь».

• Молитва преподобному Адриану, игумену Пошехонскому, покаянная. «Преподобне отче преблаженне Адриане, первейший пустыни сея просветителю и монашескаго жития основателю, пришедый в ню со ангелом Господним, и осветивый ю пресвятыя Богородицы чудотворною иконою и благодатию, в нейже и явился еси подвиги твоими пресветлое целомудрия зерцало, прекрасный смиренномудрия образе, одушевленный терпения столпе, известное воздержания правило, истинный нестяжания и нищеты любителю и всесовершенный Христов угодниче, се мы грешнии, смиренно припадая, молим тя. Приими моления наша и вознеси я на жертвенник благоутробия Божия. Испроси нам предстательством твоим у всемилостиваго Бога нашего: мир миру, церкви святей утверждение, согласие в вере, преуспеяние во благочестии и добродетелех христианских, да достойны явимся щедрот и милостей благосердаго Бога: паству твою духовную, и обитель твою святую, непрестанно управляти жезлом мудрости духовныя: подвизающимся помози, разслабленныя укрепи, падающия возстави, споспеши всем нам иго Христово в терпении и благодушии понести, и всех нас управи в мире и покаянии скончати живот наш и со упованием спасения преселится в блаженныя недра Авраамова, идеже ты радостно по трудех земных опочиваеши, прославляя со всеми святыми Триипостаснаго Бога, Отца и Сына, и Святаго Духа в безконечныя веки веков. Аминь».

• Молитва преподобному Адриану, игумену Пошехонскому, о прощении грехов. «О великий угодниче Божий преподобномучениче и чудотворче Адриане, призри на нас грешных, к честней раце святых и многоцелебных мощей твоих припадающих и просящих твоего заступления и помощи, скорбь нас одержит и не имамы помощи и утешения в мире семь скоротечном, но к тебе прибегаем, многострадальный угодниче Божий, яко сострадати нам могущему и велие дерзновение стяжавшему ко Христу Богу, к Немуже многомощен предстатель еси о всех с верою к тебе прибегающих и твоего заступления и помощи просящих. Моли убо человеколюбца Господа яко да простив нам безчисленная наша прегрешения, не отвратит милость свою от нас, но, яко благ и милосерд, явит нам безконечное свое человеколюбие и в бедах и напастех всесильную свою помощь нам подаст. Ей угодниче Божий, воздвигни преподобныя руце твои и моли Христа Бога, емуже верно послужил еси, да не отринет моления нашего недостойнства, но явит нам благовременне помощь и милость свою, да славим его щедроты и твое святое предстательство ныне, и присно, и во веки веков. Аминь».

Преподобный Геннадий Костромской, Любимоградский (1565)

Преподобному Геннадию Костромскому, Любимоградскому, молятся при бесплодии в семье.

• Тропарь преподобному Геннадию Костромскому, глас 4. «Яко пустыннолюбивая горлица, от суетнаго и многомятежнаго мира в пустыню удалився, чистотою и говением, молитвами и труждением прославил еси Бога в душе и телеси своем. И тако благочестно пожив, явился еси, преподобне Геннадие, пустыни Любимоградския украшение, иноком честнаго жития образ и теплый молитвенник за всех, притекающих к тебе с верою».

• Кондак преподобному Геннадию Костромскому, глас 3. «Молитвою и постом, труждением и терпением умертвивый всякое плоти мудрование, чистоты сосуд благолепен, Божественных даров и чудес причастник, иноком же доблий наставник был еси, сподвизаяся блаженному Корнилию, отче Богомудре. Сего ради вопием: молися ко Господу, да молитвами твоими дарует мир и спасение душам нашим».

• Молитва преподобному Геннадию Костромскому о даровании детей. «Избранниче Божий и чудотворче, преподобный отче Геннадие! От юности твоея исполнен сый Духа премудрости и разума, Духа благочестия и страха Господня, и приим вся оружия Божия, препоясав чресла твоя истиною, оболкся в броня правды и обув нозе во уготование благовествования мира, над всеми же восприим щит веры, возмогл еси, яко добр воин Христов, вся стрелы лукаваго разжженныя угасити. Сего ради водворяяся днесь с ликами Безплотных сил в обителях Отца Небеснаго, неувядаемым венцем увязен еси и, предстоя Престолу Царя славы, Господа сил, имаши дерзновение возносити к Нему моления и благохваления твоя. Мы же, окаяннии, возводя из глубины зол очи и сердца наша к Горнему Сиону, Жилищу Бога Иаковля, молим тя, преподобне Геннадие: буди заступником и ходатаем нашим пред Богом и Господем нашим, Судиею праведнейшим, Егоже выну прогневляем, согрешающе пред Ним. И якоже во дни плоти своея дивная и преславная совершил еси, отче всехвальне, тако и ныне, прешед от нас в обители Отца Небеснаго, удиви ходатайством своим милость Господню на нас. Да, отбегше нечестия и мирских похотей, Богови же благоугодивше, обрящем помощь Его во время благопотребно и благословение на ны и на дела рук наших, и да сподобит нас наследити Царство Небесное и с лики святых славити и воспевати пречестное и великолепое имя Отца, и Сына, и Святаго Духа ныне и присно и во веки веков. Аминь».

Благоверный князь Александр (в схиме Алексий) Невский (1263)

Благоверному князю Александру Невскому молятся о защите от нашествия, насилия иноверных, избавление от междоусобной брани.

• Тропарь благоверному Великому Князю Александру Невскому, глас 4. «Познай свою братию, Российский Иосифе, не в Египте, но на небеси царствующий, благоверный княже Александре, и приими моления их, умножая жита людем плодоносием земли твоея, грады владычествия твоего ограждая молением, православным людем на сопротивныя споборствуя».

• Ин тропарь благоверному Великому Князю Александру Невскому, глас 4. «Яко благочестиваго корене пречестная отрасль был еси, блаженне Александре, яви бо тя Христос яко некое Божественное сокровище Российстей земли, новаго чудотворца преславна и Богоприятна. И днесь сошедшеся в память твою верою и любовию, во псалмех и пениих радующеся славим Господа, давшаго тебе благодать исцелений. Егоже моли спасти град сей, и стране нашей Богоугодней быти, и сыновом Российским спастися».

• Кондак благоверному Великому Князю Александру Невскому, глас 8. «Яко звезду тя пресветлую почитаем, от востока возсиявшую, и на запад пришедшую, всю бо страну сию чудесы и добротою обогащаеши, и просвещаеши верою чтущия память твою, Александре блаженне. Сего ради днесь празднуем твое успение, людие твои сущии, моли спасти Отечество твое, и вся притекающия к раце мощей твоих, и верно вопиющия ти: радуйся, граду нашему утверждение».

• Ин кондак благоверному Великому Князю Александру Невскому, глас 4. «Якоже сродники твои, Борис и Глеб, явишася тебе с Небесе в помощь, подвизающемуся на Вейлгера Свейскаго и воев его: тако и ты ныне, блаженне Александре, прииди в помощь твоим сродником, и побори борющия ны».

• Величание благоверному Великому Князю Александру Невскому. «Величаем тя, благоверный княже Александре, и чтим святое успение твое, и ныне молиши за нас Христа, Бога нашего».

• Ино величание на успение благоверного Великого Князя Александра Невского. «Величаем тя, благоверный княже Александре, и чтим святое успение твое, и ныне молиши за нас Христа, Бога нашего».

• Молитва благоверному Великому Князю Александру Невскому, читаемая во время бедствия и нашествия врагов. «Скорый помощниче всех, усердно к тебе прибегающих и теплый наш пред Господем предстателю, святый благоверный великий княже Александре! Призри милостивно на ны недостойныя, многими беззаконии непотребны себе сотворшия, к раце мощей твоих (или иконе твоей) ныне притекающия и из глубины сердца к тебе взывающия: ты в житии своем ревнитель и защитник Православныя веры был еси, и нас в ней теплыми твоими к Богу молитвами непоколебимы утверди. Ты великое, возложенное на тя, служение тщательно проходил еси, и нас твоею помощию пребывати коегождо, в неже призван есть, настави. Ты, победив полки супостатов, от пределов Российских отгнал еси, и на нас ополчающихся всех видимых и невидимых врагов низложи. Ты, оставив тленный венец царства земнаго, избрал еси безмолвное житие, и ныне праведно венцем нетленным увенчанный, на небесех царствуеши, исходатайствуй и нам, смиренно молим тя, житие тихое и безмятежное и к вечному Царствию шествие неуклонное твоим предстательством устрой нам. Предстоя же со всеми святыми престолу Божию, молися о всех православных христианах, да сохранит их Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога, в Троице Святей славимаго Отца и Сына и Святаго Духа, ныне и присно и во веки веков. Аминь».

• Молитва благоверному Великому Князю Александру Невскому о защите. «О святый благоверный княже Александре! Призри милостивно на ны, недостойный рабы Божий (имена рек), и исходатайствуй нам житие тихое и безмятежное, и к вечному Царствию шествие неуклонное твоим предстательством устрой нам, да сохранит нас Господь Бог Своею благодатию в мире, здравии, долгоденствии и всяком благополучии в должайшая лета, да присно славим и благословим Бога в Троице Святей славимаго, Отца и Сына и Святаго Духа, ныне и присно и во веки веков. Аминь».

Благоверный князь Андрей Смоленский, Переяславский (1390)

Благоверному князю Андрею Смоленскому молятся о защите от врагов, об исцелении душевных и телесных хворей.

• Тропарь благоверному князю Андрею Смоленскому, глас 8. «Блаженство Евангельское возлюбив, Богомудре княже Андрее, чистоту сердца девством почтил еси, и суету мира сего презрев, устремился еси зрети Бога, Иже тя прослави чудесы во врачевании различне страждущих. Сего ради молим тя: проси нам у Христа Господа от всяких скорбей избавления и получения Царствия Небеснаго».

• Ин тропарь благоверному князю Андрею Смоленскому, глас 2. «Град твой Смоленск, яко чужд, имея, водворился еси во град Переяславль, и в дому святителя Николая жестоким житием временную жизнь совершив, востекл еси в горняя предстояти Христу; Егоже моли о творящих память твою, да вси вопием ти: радуйся, святе княже Андрее, ангелом собеседниче и человеком помощниче».

• Ин тропарь благоверному князю Андрею Смоленскому, глас 4. «Возвысився на добродетель и, очистив ум свой, к желанию прекрасному достигл еси, безстрастием украсився своим пощением изрядно, в молитвах безплотно вознесеся и возсия в мире, яко солнце, во граде Переяславле, отче преблаженне, святе княже Андрее Смоленский, моли спастися душам нашим».

• Кондак благоверному князю Андрею Смоленскому, глас 8. «Насажден во дворех Господних своими преподобными детельми, в дому святаго чудотворца Николая красно процвел еси, мира красоту и славу сего света нивочто вменив, единаго Христа возлюбил еси; слез твоих течением напаяем, уязвился еси желанием будущих даров. Темже зовем ти: радуйся, святе княже Андрее Смоленский, граду Переяславлю похвало и всей Российстей земли великое утверждение».

• Молитва благоверному князю Андрею Смоленскому для исцеления телесных недугов. «О преизрядный и дивный в чудесех, прославляемый от Бога в небеси, делателю Христова винограда, жителю вышняго Сиона, предустроеннаго града Иерусалима! Святых Ангел присная радость и человеком дивная благость, пречудных и дивных небесных селений быв желатель, а ныне со всеми святыми тех еси совосприятель. Аще естеством ты, святе княже Андрее, и был еси человек, но усердно в подвизех потщався и получил нескончаемый будущий век. Странен и пришелец на земли был еси, того ради получил житие в небеси. Оставив отечество земное и тленное, восприял еси нетленное и вечное. Сугубо тя Господь Бог увенча и чудес тебе дар дарова, еже на земли недуги исцеляти и приходящим к тебе с верою милостивно присещати; прояви бо тя нам Господь Бог милосердый, яко отец к болящим чадом благосердый. Сего ради милися деем, предстояще пред твоим многоцелебным гробом, просити и молити тя недоумем, да покрыеши нас грешных твоим предивным покровом, не от злата и серебра истканным, но от Бога ти в благодати поданным. Предстоим умильно пред твоим гробом со страхом, осквернившиися во гресе всяком; сего ради слезы проливаем и умильно к тебе взываем: помилуй нас, о святый и дивный благоверный великий княже Андрее, подаждь нам руку помощи и Божия милости. Ходатая тя к Богу предлагаем, от Негоже нам помощи желаем; вемы бо тя неложна раба Божия, избави нас от всякаго навета вражия. Буди о нас милостивый защититель и от болезней наших скор исцелитель. Свободи от руки чуждаго и от всякаго прилога злаго. Многими бедами есмы обстоими, всеми злыми скорбьми сокрушенши, к дверем смертным от скорби снидохом, и Бога грехами прогневахом, и от себе Его удалихом. Сего ради буди нам вождь и заступник, ходатай и защитниче, ко Господу нашему Иисусу Христу и к Его милосердому Отцу и Святому Духу, в триех ипостасех единому Богу, да получим мы грешнии грехов прощение и от Него милость многу. Буди, о святче Божий, споборник и заступник всему Христолюбивому воинству на вся неправославныя и крестоненавистныя злочестивыя и иноплеменныя враги и супостаты, память их злочестивыя веры да потребится, храбрость же и сила и грады да разрушатся, Русскую же нашу страну не забуди, но присно на ню призирай, и всякаго изобилие плодов земных подати Бога умоляй, и всем призывающим тя с верою во всяких скорбех, болезнех и напастех буди вспомогатель и скор исцелитель. Даруй же нам здравие неоскудно и молящимся тебе помощь неослабну, благодатию и щедротами и человеколюбием Господа Бога и Спаса нашего Иисуса Христа, Емуже от нас буди слава и держава, ныне и во вся веки нескончаемых веков. Аминь».

• Молитва благоверному князю Андрею Смоленскому для защиты от врагов и исцеления от болезней. «О святый благоверный княже Андрее, подаждь нам, рабам Божиим (имена рек), руку помощи и избави нас от всякаго навета вражия: буди нам милостивый защититель и от болезней наших скорый целитель: свободи нас от руки чуждаго, и от всякаго прилога злаго. Се бо многими бедами есмы обстоими, всеми злыми скорбьми сокрушеннии, ко дверем смертным, от скорби снидохом и Бога грехми прогневахом и от себе Его удалихом. Темже буди нам вождь и заступник пред Господем нашим Иисусом Христом, Емуже славу возсылаем со Безначальным Его Отцем и Святым Духом во веки. Аминь».

• Молитва благоверному князю Андрею Смоленскому от душевных и телесных хворей. «Владыке Человеколюбче, Царю небесный, Господе Иисусе Христе, Боже наш! Нас ради человеков и нашего ради спасения на земли с плотию явися и с человеви поживи: молим тя, Вседержителю Господи, долготерпеливе и многомилостиве, даждь нам всегда пред Тобою имети мысль благу и Тебе благоугодну, да и мрачнаго зла диавола свободившеся, со всяким усердием поработаем Тебе в преподобии и правде и истине, со страхом и трепетом во вся дни живота нашего, и до последняго издыхания воспевати Тя будем во славословии всегда бодренно и трезвенно; вся бо Ти возможна суть и без твоея воли ничтоже есть, твориши бо вся, елика хощеши творити и елика Твое неизреченное благоволит благоутробие. Како убо молчит язык наш, или киими песньми во хвалении не воспоем о Твоем к нам великом милосердии и благоутробии, яко таковыя радости нас грешных и веселия духовнаго исполнивый? Како убо возможем воспети языки нашими или киими усты восхвалити и возвеличити неизреченную Твою к нам благодать, еже показа нам такова праведника днесь? О Владыко Человеколюбче, Боже наш, Господи Иисусе Христе! Услыши нас недостойных, молящихся Тебе, и посли в помощь к нам праведнаго сего Твоего угодника, благовернаго князя Андрея, яко да молитвами его свободимся от всяких напастей душевных и телесных, ибо мы, прибегающе ко гробу его, покланяемся и целуем с верою святый его образ, подавает бо молящимся многая чудеса и исцеления. О дивный в чудесех, прославляемый от Бога в небесех, святый благоверный княже Андрее, молися о нас грешных ко Христу Богу, да помилует нас всех, приходящих ко гробу твоему и молящихся тебе с верою, и поклоняющихся образу святому твоему и с любовию целующих его, и призывающих тя на помощь во всяких скорбех и напастех: буди теплый вспомогатель и в болезнех скор исцелитель, даруй же нам здравие неоскудно и помощь неослабну молящимся тебе, буди же помощник и заступник сиротам безпомощным и вдовицам, и всем подаждь вся, яже ко спасение и пользе просимая, и святыми твоими молитвами защити, соблюди и сохрани Российския грады и страны от всех зол, болезней, напастей и навет вражиих и от нахождения иноплеменных и междоусобныя брани. Ты убо, предстоя у престола Владычня, молися о нас грешных ко Христу Богу нашему, яко Тому подобает всякая слава, честь, поклонение и великолепие, купно со Отцем и со Святым Духом, ныне и присно и во веки веков. Аминь».

Преподобный Афанасий Высоцкий, Серпуховской, Младший, игумен (1395)

Преподобному Афанасию, игумену Высоцкому, молятся о покровительстве Высоцкой обители, города Серпухова и его пределов.

• Тропарь преподобному Афанасию, игумену Высоцкому, глас 8. «Образ Божий в богосотворенней душе твоей, ум, слово, и дух соблюдая вперился еси отче преподобне Афанасие, любовию ко Всетворцу Богу, и сего ради молитвы, труды, и подвиги добродетельныя восприим, прешел еси в вечныя небесныя кровы. Отнюдуже назирай нас моля Святую Троицу, еже наследити нам горнее всерадостное блаженство».

• Молитва преподобному Афанасию, игумену Высоцкому, о покровительстве Высоцкой обители, города Серпухова и его пределов. «О преподобне и богоносне отче наш Афанасие! Ты, поработати Господеви желая, зде вселился еси, и неленостно во трудех, во бдениих, в молитвах и постех подвизался еси, и был еси наставник монашествующим, всем же людем учитель ревностный. Ныне убо, по отшествии твоем от земных, Небесному Царю предстоя, моли благость Его, еже ущедрити место селения твоего, святую обитель сию, идеже духом любве твоея неотступно пребываеши, и всем людем твоим, с верою к раце твоей припадающим, во благая прошения их исполнити. Испроси у Милостиваго Господа нашего, да низпослет нам обилие благ земных, паче же яже на пользу душ наших да дарует нам, и скончати житие сие привременное в покаянии да сподобит, в день же Судный деснаго предстояния и наслаждения во Царствии Своем да удостоит во веки веков. Аминь».

• Молитва преподобному Афанасию, игумену Высоцкому, о покровительстве Высоцкой обители, города Серпухова и его пределов. «О, чудотворче преславный и заступниче крепкий Богом собранней дружине сей! К тебе, яко скорому и избранному спасения нашего ходатаю, Богоизбранному духовных воинств воеводе, оружием молитвы твоея победителем над враги явльшуся, пред ракой святых мощей твоих припадающе, преподобне отче наш Афанасие, вседушно прибегаем: не отвратися нашея нищеты, молению нашему внемли, и от бед нас, святую обитель сию, град сей и пределы его сохрани. Простри руку твою, скорую помощь подающую. Управи ум наш от пагубоносных разсеяний, и сердца наша оскверненная очисти, освяти и горе имети утверди. От враг видимых и невидимых нас сохрани, да над страстьми победители явимся, творяще святыню во страсе Господни, и всякое уныние поправше, радоватися о Господе начнем: и тако твоими ходатайствы, во смирении и простоте сердца сподобимся до последняго издыхания боголепно славити Святую Троицу, Отца, и Сына, и Свята Духа, ныне, и присно, и во веки веков. Аминь».

Мученик Василий Мангазейский (1600)

Мученику Василию Мангазейскому молятся при болезнях глаз, слепоте, параличе.

• Тропарь мученику Василию Мангазейскому, глас 8. «Богатство видев чистыя души твоей, Василие, украсти тщашеся праведных враг, подусти господина твоего, иже покраденнаго ради богатства своего предав тя судии, и от того неповинне многия претерпел еси муки, непобедим пребыв до смерти. Тем, яко приемый венец страдания от всех Владыки, моли всем от напастей свободным быти, чтущим любовию святую память твою».

• Ин тропарь мученику Василию Мангазейскому, глас 8. «Яко пресветлое солнце, возсиял еси чудесы своими в Сибирстей стране, в Мангазейских пределех, новый мучениче, неповинный страдальче, святе Василие! За чистоту душевную и телесную пострадал еси от лютаго врага распадением и немилосердием господина своего и от начальствующаго бо ту градскаго неправеднаго судии, и муки неповинно претерпел еси, и кровь свою святую пролиял еси, желая вечнаго Царствия Небеснаго. Сего ради Христос Бог венча тя мученическими венцы на Небеси, и на земли прослави, и Своим Божиим промыслом повеле земли самой от недр своих гроб, и тело твое, и срачицу, обагренную кровию твоею, израсти нетленно. И ныне притекающим к тебе с верою и везде призывающим святое имя твое полезная вся, и грехов оставление, и телесем здравие подавай, чтущим верою святую память твою, и моли Христа Бога спастися душам нашим».

• Ин тропарь мученику Василию Мангазейскому, глас 8. «От града Ярославля Божиим смотрением в страну Сибирскую пришедшаго и за целомудрие от господина своего в Мангазеи пострадавшаго, блаженнаго Василия почтим, егоже Христос Бог мученическим венцем венча на Небеси, нетлением и чудесы прослави на земли. Ты же, честный страдальче, предстательством своим страну нашу в мире сохрани и молися о спасении душ наших».

• Кондак мученику Василию Мангазейскому, глас 4. «Страдание совершив, святе, погребения же честнаго не сподобився, в тинное место ввержен и попираемь был еси от мимоходящих, но Бог прослави мощи твоя чудесным явлением, Василие, прославляяйся во святых Своих, даяй страдальцем венец нетленный».

• Ин кондак мученику Василию Мангазейскому, глас 4. «Иже новый в мученицех неповинный страдальче, святе Василие, преревновал еси Иосифу Прекрасному и Моисею Угрину во искушениих, за чистоту душевную и телесную муки неповинно претерпел если. Сих ради прослави тя Бог, и святыя твоя мощи, по явлению твоему, от Мангазеи к Енисею во обитель Святыя Троицы ту сущим настоятелем принесошася и подают исцеления с верою приходящим и везде призывающим святое имя твое. Страстотерпче святый, моли Христа Бога о православном народе нашем и о всех воех наших, победу и одоление нам на всех непросвещенных иноязычных людех даровати, споборствуя, и от междоусобныя брани спастися всем моли».

• Ин кондак мученику Василию Мангазейскому, глас 4. «Просветися Божественною благодатию, Боголюбче, целомудрием и терпением течение свое мученически скончал еси, темже и по смерти яви тя светлость жития твоего, источаеши бо чудесы, с верою приходящим к честному гробу твоему и вопиющим: радуйся, святый Василие, Мангазейский и всея Сибири чудотворче».

• Величание мученику Василию Мангазейскому. «Величаем тя, святый праведный Василие, и чтим святую память твою, ты бо молиши за нас Христа Бога нашего».

• Молитва мученику Василию Мангазейскому при болезнях глаз и слепоте, параличе. «О святый мучениче Христов Василие, радости святых единосельниче, наших скорбей и печалей пременителю и всякаго зла демонскаго губителю, припадая, молим ти ся: приди в заступление наше, яко да очистится ум наш от деяний греховных, понеже лишаемся за сие благодати Божией и не имеем тверда основания к покаянию. Даждь нам умиление душевное и слезы грехоомывательныя, воздежи руце твоя святыя за убогие наши души ко Господу Иисусу Христу, не остави нас, грешных, ради нашего невоздержания, укрепи нас бедствующих душевными помыслы и внешними обуревании, имиже сами себе вина бываем, или от ненавидящих нас вправду, но вся по грехом нашим праведно быти исповедуем. Буди нам, малодушным, покровитель и поборник благ и милостив, присещай нас, грешных, в скорбех и печалех и сохраняй от всякаго смущения противнаго, да не когда прогневаем Бога нашего и тебе сомолебника нашего благаго, но утверди нас молитвами твоими в страсе Божии и достойна покажи своея всегда милости да наследуем блага вечныя в Царствии Небесном у Спасителя и Господа нашего Иисуса Христа, Ему же подобает слава, честь и поклонение во веки веков. Аминь».

Блаженный Иоанн, Большой колпак, Христа ради юродивый, Московский чудотворец (1589)

Блаженному Иоанну Московскому, Христа ради юродивому, молятся об исцелении душевных и телесных болезней, умирении враждующих.

• Тропарь блаженному Иоанну Московскому, Христа ради юродивому, глас 8. «Иже Христа ради, волею оставив свое отечество - град Вологду и вся красная мира сего возненавидев, желанием духовным вселился еси во град Ростов и, яко в пустыни скитался в нем, гладом, и жаждею и безмерною тяготою плоть свою изнуряя, и работая Господеви день и нощь, в посте и молитве пребывая в притворе церковнем, власы же главы своей пеплом и смолою удручая, и, ревнуя Василию блаженному, пришел еси в царствующий град Москву и в целомудрии и терпении течение добре скончав, преселился еси к вечным обителем, чудес лучи испущая, преблаженне Иоанне, отче наш, моли Христа Бога спастися душам нашим».

• Ин тропарь блаженному Иоанну Московскому, Христа ради юродивому, глас 4. «Житие твое воздержанием и терпением, благоюроде Иоанне, украсил еси, и частыми молитвами и всенощным стоянием душу твою просветил еси, и обяза тело твое и власы, и кресты с веригами тяжкими, многа лета труждаяся до исхода души твоей, и прииде на твое преставление из Ростова града в царствующий град Москву, к Пресвятей Троице и Пречистей Божией Матери, и ту погребоша тя святителие, и ныне у гроба твоего точиши исцеления приходящим ти с верою. Моли Бога прилежно с праведным Василием о православных людех. Слава Давшему ти крепость, слава Венчавшему тя, слава Действующему тобою всем исцеления».

• Ин тропарь блаженному Иоанну Московскому, Христа ради юродивому, глас 1. «Любве ради Христовы возненавидев мира сего вся прелестныя красоты, в мире живый, подвизася добре, яко ангел на земли, вечныя ради жизни, и, от земных достоинств таковых душу воскресив духом, плоть же поработив и повинув во всем духу, Христови распяся и к Божественней высоте пресветло взятся благодатию, прииде в Небесный чертог, идеже ныне, Пресвятей Троице со ангелы предстоя, во свете неизреченный радости веселишися, преблаженне Иоанне, тем благодарственно вопием ти: слава Избравшему тя в Руси, блаженне, устава изрядна, слава Укрепльшему тя в народе, слава молитвами твоими и нас Спасающему».

• Кондак блаженному Иоанну Московскому, Христа ради юродивому, глас 8. «Иже Христа ради наложивый на себя мудростию юродство, образом буйства зрим от человек, умныма же крылома горе возлетая, все тело свое веригами обязал, яко злато многоценное, соблюдеся в народе, очистив ум от страстей, веселием духовным прешел еси море мятежнаго сего жития, обрете светлость жизни вечныя, молим тя, блаженне Иоанне, молися прилежно Христу Богу нашему сохранитися нам от всякаго навета и злых обстояний видимых и невидимых враг, да зовем ти: радуйся, многострадально, яко да молитвами твоими направляеми, предстоя присно с нами, в Троице славимому Богу поем Ему: аллилуйя».

• Ин кондак блаженному Иоанну Московскому, Христа ради юродивому, глас 8. «Святое и пренепорочное понесл еси самовольное мучение, яко вено пречестное, принесл еси тело твое к Пресвятей Троице и Пречистей Богородице и ту сотворил еси честное твое преставление. Терпением твоим и смирением ангельский лики удивил еси и диавола мучителя посрамил еси, от человек отгонявши духи темныя, различная исцеления подавая. Радуйся, благоюроде Иоанне, с блаженным Василием, и печаль нашу на радость преложи, молися прилежно стране Российстей от междоусобныя брани и от безбожных язык избавитися. Радуйся, земли Российския удобрение и града нашего Москвы великое утверждение».

• Молитва блаженному Иоанну Московскому, Христа ради юродивому. «О, предивный угодниче Христов, святый праведный Иоанне, припадающе к раце цельбоносных мощей твоих, лобызаем честный твой образ с верою и усердием нелестным; со изумлением и благоговением духа прикасаемся пречудным твоим веригам, якоже иногда Павловым главотяжем и убрусцем, чающе от них действием Вышняго получити цельбу души и телу. Прославляем всемогущество Зиждителя тварей, Егоже ты в жизни сей добродетелями твоими прославил еси, ублажаем равноангельское на земли житие твое, еже ты пощением, бдением и воздержанием преукрасил еси. Проповедуем твердость веры твоея и любве, яже к Богу, темже, благоговейно воспоминающе богоносныя подвиги твоя, из глубины сердец наших вопием ти: предстательством твоим умоли Творца и Владыку всех, да и мы, верою единою одушевляеми, потщимся соблюсти единение духа, препоясавше чресла наша истиною и оболкшеся в брань правды. Ты предстоиши Престолу Агнца, заколеннаго от сложения мира; пролей теплыя молитвы твоя, да тойже Агнец упасет нас и наставит на животныя источники вод и отымет всяку слезу от очей наших любве ради Христовы. Ты тело твое святое постом и бдением и ношением тяжких вериг измождил еси; содействуй твоим ходатайством, да будем и мы выну освещаеми сиянием Незаходимаго Солнца, да будет закон Его светильник ногам нашим и свет стезям нашим. Ты, соединився с Богом, непрестанным Его зрением наслаждаешися и в вечных кровех со Ангелы беседуеши; пособствуй молитвами твоими, да и мы, представивше к житии сем телеса наша жертву живу благоприятну Богови, сподобимся вкусити с тобою Небесных немерцаемых благ. Аминь».

• Молитва блаженному Иоанну Московскому, Христа ради юродивому. «О, великий угодниче Христов Иоанне, собравшеся днесь во всечестный храм сей, усердно припадаем к тебе и, любовию ту целующе доблественные подвиги твоя и в них Самого прославляемаго во святых Своих Подвигоположника Христа Спасителя, даровавшаго тебе не точию, еже веровати в Него, но и еже ревностно Ему последовати, похвалами ублажаем и со слезами молим тя: о имый дерзновение ко Христу Спасу, о спасении всех верных ходатае Иоанне! Моли с нами, по неизреченному твоему милосердию, от всех умоляемаго Бога о чадородии безчадных, и о всем отечестве нашем, о всех христоименитых людей, да милостивно не отставит от нас вся ко спасению и житию нуждная прошения и дарует христианскую кончину животу нашему, безболезненну, непостыдну, мирну, Божественных Таин причастну, и всем, на всяком месте во всякой скорби и обстоянии требующим Его человеколюбия и помощи, великую Свою подаст милость, да Божественною Его благодатию и твоим теплым предстательством, душею и телом всегда здрави пребывающе, выну прославляем дивнаго во святых Своих Бога Израилева, не удаляющаго помощи Своея от нас всегда, ныне и присно и во веки веков. Аминь».

• Молитва блаженному Иоанну Московскому, Христа ради юродивому. «Владыко Человеколюбче, Царю Небесный, Господи Иисусе Христе, Боже наш, нас ради человек и нашего ради спасения сшедый с Небесе и явивыйся на земли и с человеки поживый! Велие есть Твое и неизреченное к роду человеческому милосердие, егоже никий язык изрещи, никая уста исповедати, ниже кая сердца возблагодарити по достоянию возмогут, обаче надеждни суще на неизреченнаго благоутробия Твоего милость, ко Твоему благосердию, Владыко, припадаем и молим Тя: Господи Вседержителю, Благотерпеливе и Многомилостиве, подаждь нам славити Тя бодренным умом во вся дни живота нашего. И паки вседушно со слезами Тя просим: о Владыко, Господи Иисусе Христе, Боже наш, услыши нас, грешных, молящихся Тебе, и помилуй нас, и даждь нам святаго и праведнаго Твоего угодника Иоанна, егоже многоцелебныя мощи соблюл еси, всем сердцем славити и на помощь нашу выну того призывати, святому образу его усердно поклонятися, и к честней его раце с верою несумненною припадати, и его молитвами подаждь молящимся Ти неизреченная чудеса и исцеления многа. Темже и тебе, о предивный чудес совершителю, святый угодниче, блаженне Иоанне, все единодушно просим: молися Христу Богу нашему о чадородии безчадных, и о всех рабех твоих, и помилуй всех, приходящих к тебе с верою, и молящихся тебе умиленною душею и сокрушенным сердцем, и покланяющихся усердно святому твоему образу, и призывати тя в скорбех и болезнех на помощь. Буди нам помощник скор и исцелитель, даруй нам неоскудное здравие ко всем помощь неослабну, буди заступник тверд сиротам и вдовицам, и всем подаждь яже ко спасению прошения, и сохрани всех нас, и соблюди от всех зол и от всех наветов вражиих. Ты бо, представ Престолу Владычню, дерзновение имаши молити неотложно о нас, грешных и недостойных рабех твоих, Христа Бога нашего, яко Тому подобает всякая слава, честь и поклонение со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь».

Блаженные Василий (1557) и Иоанн (1589) Московские, Христа ради юродивые

Блаженным Василию и Иоанну Московским, Христа ради юродивым, молятся об исцелении болезней (особенно глазных), об избавлении от пожара.

• Молитва блаженным Василию и Иоанну об избавлении от пьянства и наркозависимости, защиты дома от пожаров, исцеления от телесных недугов. «О угодницы Христовы, преблаженне Василие и Иоанне! Услышите ны, многогрешныя ныне вопиющия к вам: помилуйте нас, раб Божиих (имена рек) умилосердитеся над убожеством нашим, и молитвами вашими исцелите всяк недуг и болезнь души и тела нашего грешнаго, и сподобите ны течение жизни сея невредимо от видимых и невидимых враг и безгрешно прейти, и христианскую кончину непостыдну, мирну, безмятежну, и Небеснаго Царствия наследие получити со всеми святыми во веки веков. Аминь».

Преподобный Даниил Переяславский, архимандрит (1540)

Преподобному Даниилу Переяславскому молятся при охлаждении любви к ближним.

• Тропарь преподобному Даниилу Переяславскому, глас 3. «От юности, блаженне, всего себе Господеви возложив, выну повинуяся Богу, противяся же диаволу, страсти греховныя победил еси. Тем сам храм Божий быв, и обитель красну во славу Пресвятыя Троицы воздвигнув, и собранное тобою в ней стадо Христово богоугодно упас, преставился еси к вечным обителем, отче Данииле. Моли Триипостаснаго во едином существе Бога, спастися душам нашим».

• Кондак преподобному Даниилу Переяславскому, глас 1. «От познания себе пришед в познание Бога и благочестием к Нему восприим начало чувства внутренняго, разум свой пленил в послушание веры; тем и, подвигом добрым подвизався, достигнул еси в меру возраста совершенна исполнения Христова, яко Божие тяжание, Божие здание, делал еси брашно, не гиблющее, но брашно, пребывающее в живот вечный. Да будут единодушно вси насаждение Господне в славу, моли, блаженне, Единаго Человеколюбца Бога».

• Ин кондак преподобному Даниилу Переяславскому, глас 8. «Невечерняго Света пресветлое светило, жития чистотою просвещающее всех, явился еси, отче Данииле, образ бо и правило иноком был еси, сиротам же отец, и питатель вдовицам. Сего ради и мы, чада твоя, вопием ти: радуйся, радосте и венче наш; радуйся, многое имый к Богу дерзновение; радуйся, граду нашему велие утверждение».

• Молитва преподобному Даниилу Переяславскому при охлаждении любви к ближним. «О, преподобне и богоносне отче наш Данииле, всесмиренно к тебе припадаем и тебе молимся: не отступи от нас духом твоим, но всегда поминай нас во святых и благоприятных молитвах твоих ко Господу нашему Иисусу Христу; молися Ему, да не потопит нас бездна греховная, и да не будем врагом, ненавидящым нас, в радование; да простит Христос Бог наш твоим предстательством за нас вся согрешения наша, и Своею благодатию водворит посреде нас единодушие и любовь, и да избавит нас от козней и наветов диавольских, от глада, губительства, огня, всякия скорби и нужды, от болезней душевных и телесных и от внезапныя смерти; да сподобит Он нас, притекающих к раце мощей твоих, в истинней вере и покаянии пожити, христианския, непостыдныя и мирныя кончины жития нашего достигнути, и наследовати Царство Небесное, и славити пресвятое имя Его со Безначальным Отцем и Пресвятым Духом во веки веков. Аминь».

Преподобный Иринарх Ростовский, затворник (1616)

Преподобному Иринарху, затворнику Ростовскому, молятся об избавлении от бессонницы, об исцелении от беснования и об изгнании бесов.

• Тропарь преподобному Иринарху, затворнику Ростовскому, глас 4. «Яко мученика добропроизвольна и преподобных удобрение, звезду Ростовскую, в затворе, узах и веригах Господеви благоугодившаго и чудес благодать от Него приемшаго, Иринарха предивнаго песньми хвалебными почтим и, к нему припадающе, умильно глаголем: отче преподобне, моли Христа Бога спастися душам нашим».

• Кондак преподобному Иринарху, затворнику Ростовскому, глас 2. «Волнений множество жестоким житием преходя, изгнания, затвор и узы железныя претерпел еси мужески, Иринарше терпеливодушне, нам оставль образ злострадания и терпения твоего, озаряя чудес блистаньми с верою приходящих к честному гробу твоему, у негоже, яко почесть победную, вериги твоя тяжкия видим, от нихже подаеши исцеления недужным. Сего ради зовем ти: радуйся, Иринарше, отче предивный».

• Молитва преподобному Иринарху, затворнику Ростовскому, читаемая при бессонице, от врагов и недоброжелателей. «О, преподобне отче Иринарше! Се мы молим тя усердно: буди ходатай наш присный, испроси нам от Христа Бога мир, тишину, благоденствие, здравие и спасение, и от всех врагов видимых и невидимых ограждение, покрый же нас ходатайством твоим от нахождения всяких бед и скорбей, паче же от искушения врага темнаго, да вси мы с тобою прославляем всесвятое имя Отца и Сына и Святаго Духа, ныне и присно и во веки веков. Аминь».

• Молитва преподобному Иринарху, затворнику Ростовскому, об исцелении от беснования. «Преподобный Иринарх, великий в подвигах! Много обид от иноков монастыря, в котором ты жил, и преломление руки ты претерпел. Часто будучи изгоняем, все это кротко и любовно переносил ты Бога ради. В затворе, приковав себя цепями и обложив веригами, много лет пребыл ты, досточудный, и трудом рук твоих заработанные деньги ты раздавал нищим. Христу сраспявшись, изнурял ты тело свое, дух же укрепил и очистил, и власть против бесов от Бога принял и дар врачевать бесноватых. Поэтому, припадая к тебе, с верою и надеждою молим тебя, святый угодник Божий: прогони духов зла из людей, наказуя бесов, дерзнувших войти в создания Божии. Умилосердись, Иринарх проподобный, над несчастными и безумными, и исцели их, чтобы выздоровев, в добродетели течение жизни своей совершили, прославляя дивного во святых Своих милостивого Бога, теперь и всегда, и во веки веков. Аминь».

• Молитва преподобному Иринарху, затворнику Ростовскому, об исцелении от беснования, об изгнании бесов. «О великий угодниче Христов, добропроизвольный страдальче, новопросиявый чудесы, отче наш Иринарше. Российстей земли удобрение, граду Ростову похвало, обители сей велие украшение и утверждение! Кто не удивится твоему самопроизвольному и долголетнему страдальческому терпению: Тридесять бо лет в тесней и хладней хижине себе заключил еси, хлад, алчбу и изнурение плоти Царствия ради Небеснаго понесл еси, к сему же и изгнание из обители, по наваждению вражию, безропотно претерпел еси. Вемы же, яко посреди умолен быв от братии, яко незлобивый агнец, паки в обитель твою возвратился еси и в туюжде хижину вселился еси, яко адамант твердый, на невидимая бесовская полчища и видимыя враги твоя терпением себе вооружив. Егда же попущением Божиим наидоша на обитель сию польстии ратницы, сих не убоялся еси смертнаго прещения, но уцеломудрився словом, во своя си возвратитися сотворил еси. Сего ради Всеблагий Бог, видя твою веру и страдальческое долготерпение, дар прозорливства и исцеления тебе дарова: бесным бо исцеление, хромым доброхождение, слепым прозрение подавал еси, и иная многая с верою к тебе приходящим во благо даже доднесь чудодействуеши. Мы же недостойнии, таковая чудеса видяще и радости исполняющеся, взываем к тебе сице: радуйся, доблественный страдальче и бесов победителю, радуйся скорый наш помощниче и теплый к Богу молитвенниче. Услыши убо и нас грешных, молящихся тебе и прибегающих под кров твой: яви милостивное предстательство твое о нас ко Всевышнему и исходатайствуй твоими богоприятными молитвами вся полезная ко спасению душ и телес наших, сохрани святую обитель сию, всякий град и весь и всякую страну христианскую от всех наветов вражиих, в скорбех же и болезнех наших подавай нам руку помощи, да твоим ходатайством и заступлением, благодатию же и милосердием Христа Бога нашего, избавимся и мы недостойнии, по отшествии от жития сего, шуияго стояния, и да сподобимся деснаго со всеми святыми во веки веков. Аминь».

• Молитва преподобному Иринарху, затворнику Ростовскому, о спасении России, от бессонницы. «О предивный и преславный чудотворче, преподобне и достоблаженне отче Иринарше! Величающе труды твоя и болезни и прославляюще великое твое дерзновение ко Господу, тебе, яко отца чадолюбива, молим: ходатайствы твоими испроси нам у Господа, яже на пользу душам и телесем нашим: веру праву, надежду несомненну, любовь нелицемерну, во искушеиих мужество, в злостраданиих терпение, в благочестии преспеяния, и благословение свыше на вся благая дела и начинания наша. Испроси угодниче Христов у Всемогущаго Бога: страждущую страну Российскую от лютых безбожник и власти их да свободит, и да воставит престол православных царей: верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Не забуди, чудотворче святый, милостивно присещати обитель твою, вся грады и веси страны нашея, сохраняя и соблюдая молитвами твоими от всякаго зла. Помяни всех, веру к тебе имущих и имя твое на помощь призывающих, и вся во благих прошения их милостивно исполни. Ей, святче Божий, не лиши и нас грешных твоего заступления, сподобляя нас кончину жития благую улучити и Царствия Небеснаго наследники быти, да воспоем и прославим дивнаго во святых своих Бога, Отца, и Сына и Святаго Духа, в безконечеыя веки веков. Аминь».

• Молитва преподобному Иринарху, затворнику Ростовскому, о заступничестве. «О, преподобие отче Иринарше! Тебе предстояще, молим тя усердно ходатаем нашим присно быти и заступником. Испроси убо нам от Христа Бога мир, тишину, благоденствие, здравие и спасение, и от всех врагов видимых и невидимых ограждение, покрый же нас ходатайством твоим от нахождения всяких бед и скорбей, паче же от искушений врага темнаго, да вси мы с тобою прославляем Всесвятое имя Отца и Сына и Святаго Духа, ныне и присно и во веки веков. Аминь».

• Молитва преподобному Иринарху, затворнику Ростовскому, от чревоугодия для похудения. «О, великий угодниче Божий и преславный чудотворче, преподобне отче наш Иринарше! Призри на ны грешныя, в скорбех и обстояниих наших усердно к тебе вопиющия и на тя по Бозе все упование наше возлагающия. Просим тя со умилением многим: твоим предстательством ко Господу Богу испроси нам мир, долгоденствие, братолюбие, земли плодоносие, воздуха благорастворение, дожди благовременны, и свыше благословение на вся начинания наша благая. Избави же всех нас святыми твоими молитвами от всяких бед: глада, града, потопа, огня, меча, вредоноснаго червия, тлетворных ветров, смертоносныя язвы и напрасныя (внезапныя) смерти, и во всех скорбех наших буди нам утешитель и помощник, сохраняя ны от падений греховных и сподобляя наследники быти Царствия Небеснаго, да прославляем вкупе с тобою всех благих Подателя, Триединаго Бога, Отца и Сына и Святаго Духа во веки веков. Аминь».

Преподобный Димитрий Прилуцкий, Вологодский, игумен (1392)

Преподобному Димитрию Прилуцкому молятся об исцелении от беснования, излечения от паралича.

• Тропарь преподобному Димитрию Прилуцкому, глас 1. «Свыше от Бога, преподобне, благодать приял еси духовную, и от Него убо познался еси, блаженне, того ради и ты духом познал еси лучшая Его, будущаго века пребывание, и постнически испытався во своих обителех. И ныне со ангели ликовствуя, Спасу всех за ны молися, святе Димитрие, да вси вопием: Слава Давшему ти крепость, слава Венчавшему тя, слава Действующему тобою всем исцеления».

• Ин тропарь преподобному Димитрию Прилуцкому, глас 1. «Свыше от Бога преподобне, благодать приял еси, Димитрие преславне, и Того силою укрепляем, Евангельски ходити изволил еси, отонуду же и от Христа возмездие трудовом обрете, всеблаженне, Егоже моли спастися душам нашим».

• Кондак преподобному Димитрию Прилуцкому, глас 8. От юности, преподобне, крест твой взем, Христу последовал еси, в молитвах и пощениих, во бдениих же и злостраданиих плоть твою изнуряя; темже и Всевидящее Око, «твоя труды видев, чудесы тя прославляет и всех звати тебе научает: радуйся, преподобне отче Димитрие, постников удобрение».

• Ин кондак преподобному Димитрию Прилуцкому, глас 8. «Христа единаго в жизни сей во след идти возжелал еси и, Того любовию земная отринув, преминув Небесными, с лики Ангел водворяяся, неотступно предстоиши Богови, тем и ныне пресвятому твоему образу сретения праздник радостно сотворяюще, от недуг исцеление приемлем, благодарно вопиюще: радуйся, преподобне отче Димитрие, постников удобрение».

• Ин кондак преподобному Димитрию Прилуцкому, глас 3. «Жезлом, святе Димитрие, от Бога данным ти, люди своя упасе на пажитех закона живоносна, зверя же невидимаго шатание сокруши под нозе тебе поющих, яко да в бедах тя тепла предстателя имамы».

• Молитва преподобному Димитрию Прилуцкому об исцелении от беснования, излечения от паралича. «О священная главо, предивный чудотворче, богоносне отче наш Димитрие! Усердно припадающе к тебе, молимся: яви, нам, смиренным и грешным, многомощное твое заступление. Се бо грех ради наших, не имамы дерзновения ко Господу просити Его даров, нам благопотребных, но тебе, молитвенника к Нему благоприятного, предлагаем и просим: испроси нам у благости Его вся яже на пользу душам и телесем нашим: веру, правду, надежду несумненну, любовь нелицемерну, во искушениих мужество, в злостраданиях терпение, в молитвах постоянство, в благочестии преуспеяние, вожделенное здравие, земли плодоносие, воздуха благорастворение, дожди благовременны, житейских потреб довольство, мир во днех наших и благословение свыше на всякая благая дела наша. Не забуди, чудотворче святый, милостиво посещати обитель свою, грады и веси страны нашея православныя, сохраняя и соблюдая их молитвами твоими от всякого зла. Помяни всех, веру и любовь к тебе имущих и имя твое молитвенно призывающих, и во благих прошения их милостиво исполни, осеняя их свыше святоотеческим твоим благословением. Ей святче божий, не лиши и нас грешных твоего многомощнаго заступления, но сподоби нас кончину жития благую улучити и Царствие Небесное унаследовати. Да воспоем и прославим дивнаго во святых своих Бога нашего, Отца и Сына и Святого Духа, во веки веков. Аминь».

Святитель Димитрий, митрополит Ростовский (1709)

Святителю Димитрию, митрополиту Ростовскому, молятся о заступничестве вдовиц и сирот, о сострадании к нищим, сирым и беззащитным, о помощи в бедности и нужде, о помощи страдальцам, изнемогающим грудной болезнью.

• Тропарь святителю Димитрию Ростовскому, глас 4. «Православия ревнителю, и раскола искоренителю, Российский целебниче и новый к Богу молитвенниче, списаньми твоими буих уцеломудрил еси; цевнице духовная, Димитрие блаженне, моли Христа Бога, спастися душам нашим».

• Кондак святителю Димитрию Ростовскому, глас 8. «Звезду Российскую от Киева возсиявшую, и чрез Новград Северский в Ростов достигшую, всю же страну сию ученьми и чудесы озарившую, ублажим златословеснаго Димитрия, той бо всем вся написа, яже к наставлению, да всех приобрящет, якоже Павел Христу, и спасет правоверием души наша».

• Молитва святителю Димитрию Ростовскому о заступничестве вдов и сирот, помощи в нужде и при грудных болезнях. «О предивный и преславный чудотворче Димитрие, исцеляяй недуги человеческия! Ты неусыпно молиши Господа Бога нашего о всех грешных: молю убо тя, буди ми ходатай пред Господем и помощник на преоборение страстей ненасытныя плоти моея и на одоление стрел сопротивника моего диавола, имиже уязвляет немощное сердце мое и, аки гладный и лютый зверь, алчет погубити душу мою. Ты, святителю Христов, моя ограда, ты мое заступление и оружие! За твоим содействием сокрушу вся во мне сопротивная воле Царя царствующих. Ты, великий чудотворче, во дни подвигов твоих в мире сем ревнуя о Православной Церкви Божией, яко истинный и добрый пастырь, неблазненно обличал еси грехи и невежествия людския, и уклонившихся от стези правды в ереси и расколы наставлял еси на путь истины. Споспешествуй убо и мне исправити кратковременный путь жизни моея, да непреткновенно пойду по стези заповедей Божиих и неленостно поработаю Господеви моему Иисусу Христу, яко единому Владыце моему, Искупителю и праведному Судии моему. К сим же припадая, молюся ти, угодниче Божий, егда изыти души моей из телесе моего, избави ю от темных мытарств: не имам бо добрых дел ко оправданию моему: не даждь сатане возгордиться победою над немощною душею моею. Избави ю от геенны, идеже плач и скрежет зубов, и святыми молитвами твоими сотвори мя причастника Небеснаго Царствия в Троице славимаго Бога, Отца и Сына и Святаго Духа. Аминь».

• Молитва святителю Димитрию Ростовскому об успехе в христианской проповеди и просвещении. «О всеблаженне святителю Димитрие, великий угодниче Христов, златоусте Российский, услыши нас грешных, молящихся тебе, и принеси молитву нашу к милостивому и человеколюбцу Богу, Емуже ты ныне в радости святых и с лики Ангел предстоиши; умоли Его благоутробие, да не осудит нас по беззакониям нашим, но да сотворит с нами по милости Своей, испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем всякое изобилие и благоденствие, и да не во зло обратим благая, даруемая нам от щедраго Бога, но в славу Его и в прославление твоего заступления. Даруй нам богоугодно прейти поприще временныя жизни: избави нас воздушных мытарств и настави нас на путь, ведущий в селения праведных, идеже празднующих глас непрестанный, зрящих Божия лица неизреченную доброту; Церковь же Святую от ересей и расколов сохрани, верных укрепи, заблуждающих обрати и всем даруй вся, яже ко спасению и славе Божией подобающая. Отечество твое сохрани от врагов ненаветно, но поборай оружию крестоноснаго воинства, и подаждь нам всем твое архипастырское и святое благословение, да оным осеняеми, избавимся от козней лукаваго и избегнем от всякия беды и напасти; услыши моление наше, отче Димитрие, и моли непрестанно о нас Всесильнаго Бога, славимаго и покланяемаго в триех ипостасех, Емуже подобает всякая слава, честь и держава во веки веков. Аминь».

• Молитва святителю Димитрию Ростовскому об успехе в христианской проповеди и просвещении. «О святителю Димитрие, великий угодниче Христов, златоусте Российский! Услыши нас грешных, молящихся тебе, и принеси молитву нашу к Человеколюбцу Богу о рабах Божиих (имена рек). Умоли Его благосердие, да не осудит нас по беззаконием нашим, но да сотворит с нами по милости Своей. Испроси нам у Христа Бога нашего мирное и безмятежное житие, здравие душевное и телесное. Даруй нам богоугодно прейти поприще временныя жизни: избави нас от воздушных мытарств и настави нас на путь, ведущий в селения праведных; подаждь нам твое архипастырское и святое благословение, да оным осеняеми, избавимся от козней лукаваго и избегнем от всякой беды и напасти. Услыши моление наше, отче Димитрие, и моли непрестанно о нас Всесильнаго Бога, славимаго и покланяемаго в трех ипостасех, Емуже подобает всякая слава, честь и держава во веки веков. Аминь».

Благоверный Димитрий Угличский и Московский, царевич (1591)

Благоверному князю Димитрию, Угличскому и Московскому, царевичу, молятся о прозрении слепых очей.

• Тропарь благоверному царевичу Димитрию Угличскому, глас 1. «Царскую диадиму обагрил еси кровию твоею, богомудре мучениче, за скиптр крест в руки приим, явился еси победоносец, в жертву непорочну Владыце принесл еси себе, яко бо агнец незлоблив от раба заколен еси, и ныне радуяся предстоиши Святей Троице. Моли Христа Бога спастися душам нашим».

• Ин тропарь благоверному царевичу Димитрию Угличскому, глас 4. «Всеоружеством Духа благодати вооружен быв и необорим столп и утверждение отечеству своему показася, яко агнец незлобивый, от врага неправедно заклан быв и в жертву непорочну Господеви принесеся. И ныне дар благодати от всех Подвигоположника прием, источаеши всем исцеление, достохвальне благоверный царевичу княже Димитрие. Слава Восприимшему тя от земных в Небесная, слава Венчавшему тя венцем неувядаемым, слава Действующему тобою всем исцеление».

• Тропарь благоверному царевичу Димитрию Угличскому, перенесение мощей, глас 8. «Днесь вельми хвалится царствующий град Москва, имея в себе праведныя твоя мощи, благоверне царевиче Димитрие, яко цвети благоуханныи, пребываеми во святем храме, просвещение подают душам и телом нашим. Тем радостно тя восхваляем, и честное пренесение мощей твоих верно почитаем, и молим тя: моли Христа Бога даровати нам велию милость».

• Кондак благоверному царевичу Димитрию Угличскому, глас 8. «Возсия днесь в славней памяти твоей верным веселие, яко бо доброрасленный грезн, прозябл еси и Христу красен плод принесл еси себе; темже и по убиении твоем соблюде тело нетленно, страдальчески обагренное кровию. Благородне святе Димитрие, соблюдай отечество твое и град твой невредим, тому бо еси утверждение».

• Молитва благоверному царевичу Димитрию Угличскому о покровительстве сиротам, инвалидам и беспризорникам. «О преславный и дивный в чудесех, красото мучеников, страстотерпче княже царевичу Димитрие! Скоро предстани Небесному Царю и мученическия твоя руце о нас, грешных, молебне к Нему простри, яко имеяй дерзновение велие. Сохрани же твоими молитвами град сей и вся грады и веси православныя, и святейшия патриархи и преосвященныя митрополиты, архиепископы и епископы, и весь священный чин церковный, и вся православныя христианы; всех нас приими в твое заступление, от всех бед и зол избавляя и от нашествия видимых и невидимых борющих нас врагов свобождая, и тех всяк навет и злохитрство погубляя и отгоняя; таже прегрешений наших прощение испроси и в век будущий небеснаго царствия нас сподоби и спасенных Богу представи, благодатию и человеколюбием Господа и Спаса нашего Иисуса Христа, Ему же честь и поклонение подобает, ныне и присно и во веки веков. Аминь».

• Молитва благоверному царевичу Димитрию Угличскому о возрождении России. «О святый мучениче, благоверный царевичу и княже Димитрие! Яко агнец незлобив от раба заколенный, венцем царским от Господа венчался еси, и сын царев быв, мученик непобедим явился еси, и вместо земных и тленных на небеси нетленная восприял еси. И ныне предстоя в радости Святей Троице, посещай творящих верно твою светоносную память: соблюдай отечествие твое и град твой невредим, тому бо еси утверждение: утверди православных жительство в мире глубоце: междоусобную брань укроти, и вся полезная даруй всегда людем молитвами твоими, да верою и любовию вопием ти: радуйся, святе Димитрие, верных людей теплый заступниче и прибежище и земли Российския украшение. Аминь».

• Молитва благоверному царевичу Димитрию Угличскому о прощении грехов, избавления от бед и напастей. «О великий и милостивый страстотерпче, царевичу княже Димитрие! Услыши нас, грешных, моление со усердием тебе приносящих, и помози нам в жизни сей, от грехов и скорбей избавляя, и в будущем веце буди помощник и заступник, от мучений адовых свобождая и сподобляя купно с тобою покланятися и воспевати Всесвятую Троицу, Отца и Сына и Святаго Духа, ныне и присно и во веки веков. Аминь».

Преподобная Евфросиния Полоцкая (до крещения княжна Предислава), игумения (1173)

Преподобной Евфросиние Полоцкой молятся о покровительстве женскому монашеству, даровании мудрости и борьбе с похотью.

• Тропарь преподобной Евфросиние Полоцкой, глас 4. «Подражающи дванадесятолетна дванадесятолетну Христу, учившему во святилищи Божию слову, последовала еси, Евфросиние. Славу временную и земнаго обручника оставльши и вся мирская презревши, краснейшему паче всех Христу себе уневестила еси, крест вземши, путем ангельскаго жития шествующи и многия к Нему наставляющи, во благоухании мира в Небесный Чертог востекла еси, идеже моли, Егоже возлюбила еси, о чтущих благочестно память твою».

• Ин тропарь преподобной Евфросиние Полоцкой, глас 4. «Богатство свое нищим расточивши и славу княжескую ни во что же вменивши, обручника временнаго, красная дево, возгнушалася еси и, уневестившися Жениху Христу, Тому, якоже вено, чистоту душевную и телесную принесла еси, Евфросиние. Емуже ныне в веселии предстоя, поминай нас, чтущих память твою».

• Кондак преподобной Евфросиние Полоцкой, глас 8. «Чистое свое девство и честное милостынею, яко светильник елеем, украсившую и с мудрыми девами в пресветлый чертог Христов вшедшую, Евфросинию славную ублажим и, припадше к честным ея мощем, насладимся ея благоухания и умильне к ней возопием: яко имея дерзновение ко Христу Богу моли избавится зловония страстей и спастися душам нашим».

• Ин кондак преподобной Евфросиние Полоцкой, глас 4. «Превитаеши от земли Полотския, отечество свое, яко Авраам, наследовавши, Евфросиние, землю высоку сообразну - Горний Сион, темже тело твое душевным благомужествием, страданием постным яко жертву приносила еси милосердием Своим, Давшему Себе за человеки Жертву благоприятну».

• Ин кондак преподобной Евфросинии Полоцкой, глас 8. «Чистое свое девство и честное милостынею, яко светильник елеем, украсившую и с мудрыми девами в пресветлый чертог Христов вшедшую, Евфросинию славную ублажим и, припадше к честным ея мощем, насладимся ея благоухания и умильне к ней возопием: яко имея дерзновение ко Христу Богу моли избавитися зловония страстей и спастися душам нашим».

• Молитва преподобной Евфросиние Полоцкой о покровительстве женскому монашеству. «О преподобная и приснопамятная, всехвальная мати Евфросиние, Ангеле во плоти, Богоизбранный сосуде Святаго Духа, Церкве Христовы похвало и украшение, монашествующих славо и утверждение, отечеству, обители твоей и всей стране помоще, покрове и защитнице! Ты еси, яко древо, насажденное при исходящих вод, плоды добродетелей твоих и благодатными даровании Святаго Духа украшенная, наставнице делом и словом, избранная, непорочная и добрая. Услыши ны, молящияся тебе и призывающия имя твое, имаши бо дерзновение у Господа. Испроси нам преспеяние в жизни добродетельней, огради сердца наша верою, надеждою и любовию и страхом Божиим. Подай нам помощь в трудех и скорбех наших и, якоже попечение имела еси в житии твоем о обители твоей и иночествующих, тако и ныне потщися о нас, благопоспешити нам во всем: и обитель твою огради миром и защити от враг видимых и невидимых, да преуспевает и процветает в добродетелех. Изми ны от всякия нужды и тесноты, от лютых болезней и от нечаянныя смерти и приведи ны ко истинному покаянию при исходе из жизни сея; испроси нам у Господа Бога кончину мирну, безболезненну, непостыдну, снятых Таин причастну и преведи ны чрез мытарства воздушная, да не похитят нас истязателие грознии по грехом нашим, но да твоим заступлением и помощию возможем безбедно проити истязание воздушное, и милость получити, и предстати неосужденно страшному Престолу, и на Страшем Судищи сподобитися одесную стати Праведнаго Судии, и наследовати праведных часть. Ей, госпоже, всечестная мати, преподобная Евфросиние, помози нам молитвами твоими, огради нас и заступи от всяких козней вражиих, да сподобимся прейти время жизни сея непреткновенно и спасение получити молитвами твоими у Христа Господа, Егоже и сподобимся пети и славословити со Безначальным Отцом и со Святым Духом во веки веков. Аминь».

• Молитва преподобной Евфросиние Полоцкой о даровании мудрости и борьбе с похотью. «О преподобная мати Евфросиние! Услыши ны молящияся тебе; испроси нам, рабам Божиим (имена рек), преспеяние в жизни добродетельней; огради сердца наша верою, надеждою и любовию, и страхом Божиим, подай нам помощь во трудех и скорбех наших, изми ны от всякия нужды и тесноты, от лютых болезней и от нечаянныя смерти, и приведи ны ко истинному покаянию при исходе от жизни сея; испроси нам у Господа Бога кончину мирну, безболезненну, непостыдну, Святых Таин причастну; и проведи ны чрез мытарства воздушная. Ей, преподобная Евфросиние, помози нам молитвами твоими: огради нас и заступи от всяких козней вражиих, да сподобимся спасение получити у Христа Господа, Егоже и сподобимся славословити, со Безначальным Отцем и со Святым Духом, во веки веков. Аминь».

Святитель Иаков, епископ Ростовский (1392)

Преподобному Иакову, епископу Ростовскому, молятся для защиты от бед и скорбей, исцеления от болезней.

• Тропарь преподобному Иакову, епископу Ростовскому, глас 4. «Избран от юности Богови быв, святителю Иакове, сего ради архиерейства саном почтен, упасл еси люди, яже тебе Богом врученныя, темже и по преставлении чудес дарования от Бога приял еси исцеляти различныя недуги. Моли о нас, совершаюших честную память твою, да тебе непрестанно величаем».

• Ин тропарь преподобному Иакову, епископу Ростовскому, глас 4. «Святителие премудрии, паствы вашея учителие богопросвещеннии, веру евангельскую в людех преумножившии, любве Небесныя на земли достоподражательнии образи, люди страны Ростовския и Ярославския приобщавшии спасению, служителие воистинну Божии и сопричастницы апостолов достойнии явилися есте, Леонтие священномучениче, Исаие, Игнатие, Иакове, Феодоре и златословесниче Российский Димитрие, Христа Бога молите о архиереех, на престоле вашем преемницех, о людех, благочестно вас почитающих, о стране нашей православней и о всей Христовей Церкви».

• Кондак преподобному Иакову, епископу Ростовскому, глас 8. «Яко архиереев сопрестольник и святителем изрядный поборник был еси, святителю Иакове, непрестанно сохраняй отечество твое, град же и люди, тебе верою почитающия и честным мощем твоим покланяющияся, да велегласно тебе вопием: радуйся, Иакове Богомудре».

• Ин кондак преподобному Иакову, епископу Ростовскому, глас 4. «Новаго Завета Бога с человеки хранителие, евангельских заповедей исполнителие, в добрых делех совершеннии, святителие мудрии, преподобнии и праведнии Богоноснии, землю Ростовскую и Ярославскую облагоухавшии молитвами, именуемии вси и неименуемии, явленнии и сокровеннии, предстояще Живоначальней Троице, не отступайте от нас духом и Божественное милосердие преклоните к нам, да с дерзновением славу Вышних Богу вси приносим, да пребудет на земли мир нерушимый, любовь же и благоволение посреде всех человек».

• Величание преподобному Иакову, епископу Ростовскому. «Величаем тя, святителю отче Иакове, и чтим святую память твою, ты бо молиши за нас Христа Бога нашего».

• Молитва преподобному Иакову, епископу Ростовскому, для защиты от бед и скорбей, исцеления от болезней. «О, пречудне и преблаженне отче, святителю Христов Иакове! С верою и любовию к тебе припадающе, молим тя: огради нас святыми твоими молитвами от всякия беды, скорби и болезни, и от всякаго праведно движимаго на нас гнева Божия. Испроси нам тихое и безмятежное житие, во всяком благочестии и чистоте, и помози нам спасение улучити и царствия небеснаго достигнути. Ей, угодниче Божий и заступниче наш! Не презри усерднаго моления сего нашего, но призри на ны милостивно и умоли о нас всещедраго человеколюбца Бога, да не погибнем люте в беззакониих наших, но да сподобимся с тобою и всеми святыми славити и воспевати всесвятое имя его, Отца и Сына и Святаго Духа, ныне и присно и во веки веков. Аминь».

• Молитва преподобному Иакову, епископу Ростовскому, для защиты от бед и скорбей, исцеления от болезней. «О святителю Христов Иакове, усердно молим тя: огради нас, раб Божиих (имена рек), святыми твоими молитвами от всякия беды, скорби и болезни и от всякаго гнева Божия, праведно на ны движимаго; испроси нам тихое и безмятежное житие, во всяком благочестии и чистоте; помози нам спасение получити и Царствия Небеснаго достигнути. Ей, угодниче Божий! Не презри усерднаго моления сего нашего и умоли о нас Всещедраго Человеколюбца Бога, да не погибнем люте со беззаконии нашими, но да сподобимся с тобою и со всеми святыми славити и воспевати всесвятое имя Его во веки веков. Аминь».

Блаженный Иоанн Власатый, Милостивый, Ростовский, Христа ради юродивый (1580)

Блаженному Иоанну Власатому молятся об исцелении телесных недугов.

• Тропарь блаженному Иоанну Власатому, глас 8. «Явился еси во граде яко в пустыни, в смиренномудрии, чистоте и в трудех, и подвизех, и в терпении мнозе, преблаженне отче Иоанне. Взем бо Крест Христов последова Ему и бе в молитвах и псалмопении день и нощь, иноязычнаго речения о спасении всего мира христианскаго рода и преселился еси к Невечернему Свету. Ныне же ко гробу Твоему вернии приходящий, моляся Господеви, Богородице и Предтечи, приемлют исцеления молитвами твоими. Но присно за ны молися, блаженне отче Иоанне, спастися душам нашим».

• Ин тропарь блаженному Иоанну Власатому, глас 4. «Явился еси во граде, яко в пустыни, смиреномудрием и чистотою, и взем крест Христов последова Ему в трудех и подвизех, и в терпении мнозе, преблаженне отче Иоанне. И ныне моли о нас совершающих память твою, и усердно притекающих к раце мощей твоих, избавитися от бед, и душам нашим подати велию милость».

• Кондак блаженному Иоанну Власатому, глас 8. «Христовою любовию уязвися, отче Иоанне блаженне, вышния красоты желая, земная же вся презре и ни во чтоже вмени. И на земли ангельское житие препроводи, в вечный покой достиже, идеже глас празднущих, с нимиже молися за ны. И душам нашим прощение, и телесем исцеление даруй».

• Ин кондак блаженному Иоанну Власатому, глас 2. «Христовою любовию уязвися отче Иоанне блаженне, вышния красоты желая, земная же вся презре и ни вочтоже вмени, и на земли ангельское житие имея, преселился еси в вечный покой, идеже предстоя Христу Богу моли спастися нам и всему христианскому роду яко да зовем ти: радуйся преблаженне отче Иоанне».

• Молитва блаженному Иоанну Власатому об исцелении телесных недугов. «О всесвятый угодниче Христов, Иоанне преблаженне! Услыши нас, молящихся тебе и прибегающих под кров твой, яви на нас (имена рек) многую твою милость и исходатайствуй нам от Всевышняго богоприятными твоими молитвами вся полезная ко спасению душ и телес наших: сохрани приход наш и люди, живущия в нем, от всякаго озлобления помощию твоею. Темже святую твою память чтуще воспети тебе дерзаем сицевая: радуйся, христиан всех теплый к Богу молебниче; радуйся, приходу нашему похвало и утверждение; и якоже ныне, тако и при кончине нашей испроси у Христа Бога обрести нам велию милость. Аминь».

Мученицы Евдокия Шейкова, Дария Улыбина, Дария Тимагина и Мария Неизвестная (1919)

Мученицам Евдокии Шейковой, Дарии Улыбиной, Дарии Тимагиной и Марии Неизвестной молятся об укреплении в вере.

• Тропарь мученицам Евдокии Шейковой, Дарии Улыбиной, Дарии Тимагиной и Марии Неизвестной, глас 4. «Царствия ради Небеснаго мир и вся яже в мире оставили есте, тесноту совершеннаго послушания возлюбивши, дивныя подвижницы и Христа ради мученицы в годину лютых испытаний в земли Новгородстей процветшия, блаженныя матери наша Евдокие, Дарие, Дарие и Марие, помяните нас у Престола Пресвятыя Троицы».

• Кондак мученицам Евдокии Шейковой, Дарии Улыбиной, Дарии Тимагиной и Марии Неизвестной, глас 8. «Житием праведным к достойному приятию мученичества себе уготовившия без боязни тридневная избиения и смерть претерпели есте Невесты Христовы предивныя блаженныя Евдокие, Дарие, Дарие и Марие, ныне многими чудесы и исцелении просиявшия, не оставите землю Русскую без покаяния погибнути».

• Молитва мученицам Евдокии Шейковой, Дарии Улыбиной, Дарии Тимагиной и Марии Неизвестной. «О, дивныя подвижницы и заступницы наша мученице Евдокие, Дарие, Дарие и Марие - древних отец подражательницы истинны, в тесноте послушания без разсуждения, бдения и поста изнурительнаго пожившия - ныне к вам прибегаем и, к мощем вашим припадающе, молим вас: о, страстотерпицы святыя, незлобивыя агницы, своею кровию Христа ради обагренныя и жестокими предателями тридневно мучимыя и закланныя; о, прозорливицы, многия души от гибели вечныя исхитившия и о страданиях прежде кончины от Господа извещенныя, о, исцелительницы и чудотворицы не токмо в земли Нижегородстей, но и во всей стране Российстей просиявшия, - не оставите нас во грехах и беззакониих погибнути, но помозите в покаянии истиннем житие наше скончати, славяще Святую Троицу Отца и Сына и Святаго Духа во веки веков. Аминь».

Молитвы на четверг

Уриил, Архангел

Архангелу Уриилу, просветителю душевных и телесных чувств, молятся о наставничестве заблудших.

• Молитва Архангелу Уриилу, читаемая в четверг. «Святый Архангеле Божий Урииле, светом Божественным oзаряемый и преизобильно исполненный oгнем пламенной горячей любви, брось искру oгня сего пламенного в мое сердце холодное, и душу мою темную светом твоим oзари. O великий Архангеле Божий Урииле, ты еси сияние oгня Божественного и просветитель помраченных грехами: просвети ум мой, сердце мое, волю мою силою Святаго Духа, и настави меня на путь покаяния, и умоли Господа Бога, да избавит меня Господь oт ада преисподняго и oт всех врагов видимых и невидимых, ныне и присно и во веки веков. Аминь».

Пресвятая Богородица

Пресвятой Богородице молятся в минуты скорби и отчаяния, о защите от болезни и порчи, при семейных неурядицах, об укреплении веры, об избавлении от искушения, о возвращении надежды, в любой жизненной ситуации.

• Молитва Пресвятой Богородице, читаемая в четверг. «Кто Тебе по достоянию ублажити может, Пресвятая Дево, чии уста воспети способны Твое величие, всяк смысл превосходящее? Вся преславная о Тебе содеянная таинства, Богородице, выше смысла и слова суть; красоте девства Твоего и пресветлой чистоте Твоей удивишася Херувимы и ужасошася Серафимы; чудесе бо рождества Твоего нетленнаго ни человеческий, ни ангельский язык изрещи может. От Тебе бо безлетный и Единородный Сын Божий, Бог Слово, неизреченно воплощишся, родися и с человеки поживе, и Тя, яко Матерь Свою, зело возвеличи. Царицу Тя всея твари показа, нам же известное спасения пристанище. Тем вси под кров Твой притекающий, различными скорбями и болезньми одержимии, приемлют от Тебе богатно утешение и исцеление и Тобою от бед спасаются: Ты бо еси воистину Мати всех скорбящих и обремененных, печальных радость, больных целительница, юным хранительница, старости жезл, праведных похвала, грешным спасения надежда и к покаянию путеводительница: всем бо всегда предстательством Твоим помогавши и всех заступаешь, Всеблагая, прибегающих к Тебе с верою и любовию. Ты и мне помози, отчаянному деяний моих ради. Заступнице усердная рода христианскаго; заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота; не остави убо мене и не презри мя, но ими же Сама веси судьбами спаси мя, яко благословенна еси во веки веков. Аминь».

Молитвы на каждый день

Молитва Господня

Читается поутру, сразу после сна.

• «Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго, яко Твое есть Царство и сила и слава ко веки веков. Аминь».

Молитва Иисусова

Постоянная, круглосуточная.

• «Господи, Иисусе Христе, Сыне и Слове Божий, Богородицы ради, помилуй мя» - преподобный Нил Мироточивый Афонский (XVII век).

• «Господи Иисусе Христе, Сыне Божий, помилуй мя, грешнаго» - преподобный Исихий, просвитер Иерусалимский (Добротолюбие. М., 1900 г. т.2, с 159).

• «Господи Иисусе Христе, помилуй мя» - святой Григорий Синаит.

• «Сыне Божин, помилуй мя, грешнаго» - святитель Игнатий Брянчанинов.

• «Господи, Иисусе Христе, Сыне Божий, молитвами Богородицы помилуй мя грешнаго» - преподобный Серафим Саровский.

• «Господи Иисусе Христе, Сыне Божий, милитв ради Пречистыя Твоея Матере и всех святых, помилуй нас. Аминь» - Православный катехизис.

Молитва Святому Духу

Читается в течение дня.

• «Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша».

Песнь Пресвятой Богородице

Читается 12 или 24 раза в течение дня.

• «Богородице Дево, радуйся! Благодатная Марие, Господь с Тобою, благословена Ты в женах, и благословен плод чрева Твоего, яко Спаса родила ecu душ наших».

Молитва Трисвятое

Читается один раз в сутки, три раза подряд. Например перед сном.

• «Святый Боже, Снятыи Крепкий, Святыи Безсмертный, помилуй нас».